ترال: جموں و کشمیر اسمبلی انتخابات کے پہلے مرحلے کے لیے انتخابی تشہیر کا سلسلہ زور شور سے جاری ہے۔ اس سلسلے میں ترال حلقہ انتخاب عوامی اتحاد پارٹی کے امیدوار ڈاکٹر ہر بخش سنگھ نے آج خانقاہ، میڈورہ، نانر سمیت دیگر کئی دیہاتوں کا دورہ کر کے مقامی لوگوں سے ملاقات کی۔
اس دوران انہوں نے عوام کو عوامی اتحاد پارٹی کے حق میں ووٹ ڈالنے کی اپیل کی اور کہا کہ عوام خاص طور پر نوجوانوں کو اب کی بار گھروں سے نکل کر حق رائے دہی کا استعمال کرنا چاہیے تاکہ ایک صاف ستھرا اور ایماندار لیڈر عوام کی نمائندگی کر سکے۔
انہوں نے مزید کہا کہ آج تک ترال میں کوئی بھی لیڈر عوام کے خواہشات پر پورا نہیں اترا ہے۔ اس لیے نوجوانوں کو ارداہ کرنا چاہیے کہ اب کی بار روایتی سیاست کو بالاے طاق رکھتے ہوئے عوامی اتحاد پارٹی کو ایک بار موقع دیں۔ ڈاکٹر ہر بخش سنگھ نے بتایا کہ انھیں یقین ہے کہ اب کی بار ترال میں لوگوں نے تبدیلی کا من بنا لیا ہے۔
غور طلب ہے کہ الیکشن کمیشن آف انڈیا نے جموں کشمیر میں انتخابی نتائج کی تاریخ کو تبدیل کر دیا ہے۔ اب جموں کشمیر اسمبلی کے نتائج 8 اکتوبر کو آئیں گے۔ پہلے کے شیڈول کے مطابق نتائج کا اعلان 4 اکتوبر کو کیا جانا تھا۔ ہریانہ میں انتخابات کی تاریخ کو بدلا گیا ہے اب یہاں یکم اکتوبر کے بجائے 5 اکتوبر کو ووٹ ڈالے جائیں گے۔ ہریانہ کے بھی انتخابی نتائج 8 اکتوبر کو سامنے آئیں گے۔
