ترال: ترال علاقے میں سیاسی مہم عروج پر ہے۔ اس حوالے سے مختلف سیاسی جماعتوں نے ریلیاں، روڈ شوز اور عوامی میٹنگوں کا سلسلہ شروع کر دیا ہے۔ جموں و کشمیر اسمبلی انتخابات کے پہلے مرحلے کے لیے چناؤ مہم دوسرے روز بھی جاری رہا۔
اس سلسلے میں ترال حلقہ اسمبلی کے پی ڈی پی امیدوار رفیق احمد نایک نے اپنی رہایش گاہ سے حاجن تک ریلی نکالی، جس دوران انہوں نے راستے میں متعدد مقامات پر عوام سے خطاب کیا۔
انہوں نے بتایا کہ ترال میں آج تک نہ ہی طبعی شعبے کی ابتری کو ٹھیک کیا گیا ہے اور نہ ہی علاقے کے ٹورازم کی طرف توجہ دی گئی ہے، حالانکہ علاقہ ٹورازم کے لیے ایک اہم سنگ میل ثابت ہو سکتا ہے۔
انہوں نے مزید بتایا کہ علاقے میں اگرچہ ہاٹیکلچر سیکٹر کو فروغ ملا ہے لیکن باغ مالکان کو مناسب معاوضہ نہیں مل رہا ہے، اس لیے اگر میں کامیاب ہوتا ہوں تو یہاں کی مجموعی ترقی اور دیگر معاملات کو لیکر بات کرتا رہوں گا۔
غور طلب ہے کہ الیکشن کمیشن آف انڈیا نے جموں کشمیر میں انتخابی نتائج کی تاریخ کو بدل دیا ہے۔ اب جموں کشمیر اسمبلی کے نتائج 8 اکتوبر کو آئیں گے۔ پہلے کے شیڈول کے مطابق نتائج کا اعلان 4 اکتوبر کو کیا جانا تھا۔ ہریانہ میں انتخابات کی تاریخ کو بدلا گیا ہے اب یہاں یکم اکتوبر کے بجائے 5 اکتوبر کو ووٹ ڈالے جائیں گے۔ ہریانہ کے بھی انتخابی نتائج 8 اکتوبر کو سامنے آئیں گے۔
