اننت ناگ: ’’پہاڑی اتھنک ٹرائبل مومنٹ‘‘ نامی تنظیم کے اراکین نے جنوبی کشمیر کے اننت ناگ ضلع میں خاموش احتجاج درج کیا۔ اننت ناگ کے وزیر باغ میں تنظیم کی جانب سے ایک میٹنگ طلب کی گئی جس میں پہاڑی طبقہ کو درپیش مختلف مسائل پر تفصیل سے بات چیت کی گئی۔ میٹنگ کے دوران مقررین نے اس بات پر زور دیا کہ چھ ماہ قبل پہاڑی طبقہ کو ایس ٹی (شیڈول ٹرائب) کا درجہ دیا گیا تاہم اس کے باوجود بھی انہیں سرٹفکیٹس فراہم نہیں کی جا رہی ہیں، سرٹیفکیٹ حاصل کرنے کے لئے محکمہ مال کے دفاتر کا بار بار رخ کرنے کے باوجود تاخیر اور ٹال مٹول سے کام لیا جا رہا ہے۔
تنظیم کے ممبران نے حیرانگی کا اظہار کرتے ہوئے کہا کہ اگر سرکار نے انہیں ایس ٹی درجے کا حق دیا ہے تو انہیں اس سے محروم کیوں رکھا جا رہا ہے! اس موقع پر مقررین نے اس امر پر افسوس کا اظہار کیا کہ متعلقہ حکام کی جانب سے کوئی خاطر خواہ تعاون نہیں مل رہا ہے، جس کی وجہ سے پہاڑی کمیونٹی کی مشکلات میں اضافہ ہو رہا ہے۔
پہاڑی اتھنک ٹرائبل مومنٹ نے انتظامیہ سے پُر زور مطالبہ کیا کہ ان کے مسائل پر سنجیدگی سے غور کیا جائے اور فوری طور پر سرٹیفکیٹ کے اجراء کے عمل کو یقینی بنایا جائے تاکہ پہاڑی طبقہ کو ان کے جائز حقوق مل سکیں۔ میٹنگ میں شامل مقررین نے محکمہ مال کے دفاتر میں افسران کے رویے کی سخت الفاظ میں مذمت کی۔ ان کا کہنا تھا کہ پہاڑی کمیونٹی کے لوگ اکثر دور دراز کے علاقوں سے سفر کر کے آتے ہیں اور افسران کی جانب سے غیر ضروری تاخیر کی وجہ سے انہیں اپنا کام کاج چھوڑ کر دفاتر کے چکر لگانے پڑتے ہیں۔ اس کے نتیجے میں، نہ صرف ان کا وقت ضائع ہوتا ہے بلکہ مالی مشکلات کا بھی سامنا کرنا پڑتا ہے۔
مقررین نے حکومت سے مطالبہ کیا کہ پہاڑی کمیونٹی کے مسائل کے حل کے لئے ایک خصوصی کمیٹی تشکیل دی جائے جو کہ ان کی مشکلات کو ترجیحی بنیادوں پر حل کرے۔ انہوں نے مزید کہا کہ اگر حکومت واقعی پہاڑی کمیونٹی کی فلاح و بہبود چاہتی ہے تو اسے فوری اقدامات کرنے ہوں گے تاکہ ان کے مسائل حل ہو سکیں اور انہیں ان کا جائز حق مل سکے۔
پہاڑی اتھنک ٹرائبل مومنٹ کے نمائندوں نے میٹنگ میں اس بات پر بھی زور دیا کہ پہاڑی کمیونٹی کو دیگر شیڈولڈ ٹرائبس کے برابر حقوق اور مراعات فراہم کی جائیں؛ تاکہ تعلیمی، معاشی اور سماجی شعبوں میں پہاڑی کمیونٹی کو خصوصی رعایات دی جائیں اور ان کی معاشرتی ترقی ممکن ہو سکے۔ آخر میں، میٹنگ کے شرکاء نے متفقہ طور پر فیصلہ کیا کہ اگر حکومت اور متعلقہ حکام ان کے مطالبات کو نظرانداز کرتی ہے تو وہ احتجاج کا راستہ اپنائیں گے۔
یہ بھی پڑھین: جعلی سرٹیفکیٹ پیش کرنے کے الزام میں تین ملزموں کے خلاف چارج شیٹ دائر، کرائم برانچ کشمیر
