بڈگام: وسطی کشمیر کے ضلع بڈگام میں 29 فروری سے لاپتہ ایک معمر شہری کی لاش ضلع کے بڈی پورہ علاقے کے کیریواز سے برآمد ہوئی۔ ابتدائی معلومات کے مطابق لاش کو مقامی باشندوں نے دیکھا اور فوری طور پر نزدیکی پولیس اسٹیشن کو اطلاع دی۔ اطلاع موصول ہوتے ہی بڈگام پولیس کی ایک ٹیم جائے موقع پر پہنچی اور لاش کو اپنی تحویل میں لے لیا۔
بعد ازاں پولیس نے لاش کو طبی و قانونی لوازمات کی تکمیل کے لیے نزدیکی اسپتال منتقل کر دیا۔ لوازمات کی تکمیل کے بعد میت کو آخری رسومات کی انجام دہی کے لیے لواحقین کے سپرد کر دیا گیا۔ متوفی کی شناخت دلی پورہ، ناگم کے عبدالمجید لون کے طور پر ہوئی ہے متوفی کی عمر 60 برس کے قریب بتائی جا رہی ہے جو 29 فروری کو اپنے گھر سے لاپتہ ہو گیا تھا۔
مزید پڑھیں: بجبہاڑہ میں کرائے کے مکان سے خاتون کی لاش برآمد
بڈگام پولیس نے اس ضمن ایف آئی آر درج کرکے تفتیش شروع کر دی ہے۔ پولیس کا کہنا ہے کہ پوسٹ مارٹم رپورٹ کے بعد ہی موت کی اصل وجہ معلوم ہو سکے گی۔ پولیس کا کہنا ہے کہ اس ضمن میں مکمل تفتیش کے بعد ہی یہ بات معلوم ہو پائے گی کہ معمر شہری کی موت کیسے ہوئی، آیا یہ موت قدرتی ہے یا قتل کا معاملہ ہے۔ بڈگام پولیس کا کہنا ہے کہ اس ضمن میں تفتیش جاری ہے اور جلد ہی پولیس کسی نتیجے پر پہنچے گی اور اس ضمن میں کچھ اور کہنا قبل از وقت ہوگا۔
