بارہمولہ (جموں کشمیر) : شمالی کشمیر کے سوپور علاقے میں دو عسکریت پسندوں کی ہلاکت کو فوجی افسر نے ’’دہشت گردی کے خلاف جنگ میں بڑی کامیابی‘‘ قرار دیتے ہوئے کہا کہ ’’کشمیر میں امن کی بحالی میں عوام کا تعاون کلیدی کردار ادا کر رہا ہے۔‘‘ سوپور علاقے میں انکاؤنٹر کے بعد میڈیا سے گفتگو کرتے ہوئے 5 سیکٹر کے کمانڈر دیپک موہن نے کہا کہ ’’گزشتہ ہفتوں کے دوران بھارتی فوج اور جموں و کشمیر پولیس نے مشترکہ کارروائیوں میں دہشت گردوں کا سراغ لگاتے ہوئے متعدد اہم کامیابیاں حاصل کی ہیں۔‘‘
دیپک موہن کا کہنا ہے کہ ’’ان کارروائیوں میں کئی مطلوب دہشت گردوں کو مارا گیا جو کہ مختلف دہشت گردانہ سرگرمیوں میں ملوث تھے۔‘‘ فوجی افسر نے عوام کی غیر متزلزل حمایت کو سراہتے ہوئے کہا کہ ’’کشمیری عوام کی مدد اور ان کے تعاون کے بغیر یہ کامیابیاں ممکن نہ تھیں۔‘‘ انہوں نے مقامی لوگوں کی کاوشوں پر ان کا شکریہ ادا کیا جو کشمیر میں امن و استحکام برقرار رکھنے کے لیے اپنی کوششیں جاری رکھے ہوئے ہیں۔
سوپور کے پانی پورہ کے مقام پر عسکریت پسندوں کے خلاف آپریشن کی تفصیلات بیان کرتے ہوئے افسر نے بتایا کہ ’’اس کارروائی میں دو غیر ملکی دہشت گرد مارے گئے۔‘‘ انہوں نے کہا کہ ’’یہ دہشت گرد گروپ شمالی کشمیر میں کافی عرصے سے سرگرم تھا اور ان کی نقل و حرکت پر قریبی نظر رکھی جا رہی تھی۔‘‘ یاد رہے کہ سوپور میں انکاؤنٹر کے دوران دو عسکریت پسندوں کو ہلاک کیا گیا۔
فوجی افسر نے مزید بتایا کہ آپریشن کے دوران فوجیوں نے شہریوں کے تحفظ کو یقینی بنایا اور عسکریت پسندوں کے اندھا دھند فائرنگ کے باوجود پیشہ ورانہ مہارت کے ساتھ جوابی کارروائی کی۔ قریبی آبادی کو محفوظ مقام پر منتقل کیا گیا اور کوآڈ کاپٹرز سمیت جدید سرویلنس ٹیکنالوجی کا استعمال کرتے ہوئے عسکریت پسندوں کی حرکات و سکنات پر نظر رکھی گئی، جس سے کامیابی کے ساتھ خطرے کا مؤثر تدارک کیا گیا۔‘‘
یہ بھی پڑھیں: سوپور انکاؤنٹر: دوسرے دن بھی فائرنگ کا سلسلہ جاری، دو نامعلوم عسکریت پسند ہلاک - Sopore encounter
