سری نگر: وادی کشمیر میں درجہ حرارت صفر سے نیچے ہے۔ خشک موسم کے باعث سردی بڑھ گئی ہے۔ وادی کے تمام 10 اضلاع میں درجہ حرارت صفر سے نیچے ریکارڈ کیا گیا۔ گلمرگ، سونمرگ اور پہلگام جیسے سیاحتی مقامات پر سردی مزید سخت ہے۔ سری نگر، بارہمولہ، شوپیاں، پلوامہ، اننت ناگ، بڈگام، گاندربل، کولگام، بانڈی پورہ میں درجہ حرارت منفی پانچ سے تین ڈگری سیلسیس کے درمیان ریکارڈ کیا گیا۔
محکمہ موسمیات نے 17 دسمبر تک موسم خشک رہنے کی پیش گوئی کی ہے۔ سرد لہر کے رواں ہفتے تک جاری رہنے کا امکان ہے۔ آئی ایم ڈی نے پیش گوئی کی ہے کہ مغربی ڈسٹربنس کی وجہ سے 16 اور 17 دسمبر کو جموں و کشمیر، لداخ اور آس پاس کے علاقوں میں ہلکی بارش اور برف باری کا امکان ہے۔
تین دن پہلے سرد اور خشک موسم سے اس وقت کچھ راحت ملی جب پہلگام، گلمرگ، سونمرگ، شوپیاں اور دیگر پہاڑی مقامات پر ہلکی سے درمیانی برف باری ہوئی۔ اس کی وجہ سے 120 دن کی خشک سالی ٹوٹ گئی، کیونکہ کشمیر میں اس سے پہلے تین ماہ قبل بارش ہوئی تھی۔
یہ بھی پڑھیں: پلوامہ میں موسم کی پہلی برفباری، لوگوں کے چہروں پر مسکراہٹ
ٹریفک کی صورتحال
ٹریفک پولیس کے ترجمان نے بتایا کہ خشک موسم کی وجہ سے سری نگر جموں جیسے علاقوں میں برف باری نہیں ہوئی جس کی وجہ سے سڑکیں مکمل طور پر کھلی ہیں۔ ٹریفک پولیس نے بتایا کہ جموں سری نگر قومی شاہراہ پر دونوں طرف سے ٹریفک ہموار ہے۔ مسافروں کو مشورہ دیا جاتا ہے کہ وہ لین کے نظم و ضبط پر عمل کریں کیونکہ اوور ٹیک کرنے سے ٹریفک جام ہو جائے گا۔ اس کے ساتھ ساتھ مسافروں کو یہ بھی مشورہ دیا جاتا ہے کہ وہ دن کے وقت جموں سری نگر ہائی وے پر سفر کریں اور رامبن اور بانہال کے درمیان غیر ضروری رکنے سے گریز کریں کیونکہ لینڈ سلائیڈنگ/پتھر گرنے کا خدشہ ہے۔
انہوں نے کہا کہ ڈوڈہ ضلع میں بھدرواہ-چمبا روڈ گاڑیوں کی آمدورفت کے لیے کھلا ہے۔ تاہم کشمیر کے علاقے میں سڑکوں کی دیکھ بھال کرنے والی ایجنسیوں سے گرین سگنل ملنے کے بعد مغل روڈ، سنتھن روڈ اور سونمرگ-کرگل روڈ پر ٹریفک کی اجازت ہوگی۔
یہ بھی پڑھیں: بارہمولہ: سوپور کے میدانی علاقوں میں موسم کی پہلی برفباری
