اننت ناگ: جنوبی کشمیر کے اننت ناگ ضلع کے شانگس لارنو جنگلاتی علاقے میں کچھ دیر پہلے سیکورٹی فورسز کے ساتھ جاری مسلح تصادم میں دو نامعلوم عسکریت پسند ہلاک ہوگئے۔ پولیس ذرائع نے بتایا کہ شانگس لارنو کے جنگلاتی علاقے میں آپریشن کے دوران اب تک دو ملیٹینٹ مارے گئے ہیں۔ غالباً ایک اور ملیٹینٹ علاقے میں موجود ہے جسکی تلاش کے لیے آپریشن بدستور جاری ہے، بتایا جارہا ہے کہ مہلوک عسکریت پسندوں میں ایک ملیٹینٹ مقامی ہے اور دوسرا غیر ملکی ہے۔ جنگلاتی علاقہ میں سرچ آپریشن جاری ہے۔
انہوں نے کہا کہ علاقے میں عسکریت پسندوں کی موجودگی کے بارے میں ایک خاص اطلاع ملنے کے بعد پولیس اور سیکورٹی فورسز نے تلاشی آپریشن شروع کیا تھا۔ اننت ناگ کے جنگلاتی علاقہ میں عسکریت پسندوں کی موجودگی کی مصدقہ اطلاع کے بعد فوج، پولیس اور سی آر پی ایف کی مشترکہ کاروائی کے بعد انکاونٹر شروع ہوا تھا۔ فوج کے مطابق مارے گئے عسکریت پسند حال ہی میں شانگس کے رہنے والے ٹیریٹوریل فوجی جوان ہلال احمد کی ہلاکت کے ذمہ دار تھے۔
یہ بھی پڑھیں: سرینگر کے خانیار میں عسکریت پسندوں اور سیکورٹی فورسز کے درمیان تصادم، انکاونٹر جاری
واضح رہے کہ گذشتہ ماہ ملیٹینٹوں نے نوگام شانگس سے تعلق رکھنے والے رائفل مین ہلال احمد بٹ کو اغوا کرنے کے بعد سنگلن کے جنگلاتی علاقے میں ہلاک کیا تھا، تب سے فوج کی جانب سے علاقے میں چوکسی برتی جارہی تھی اور ملیٹینٹوں کی تلاش لگاتار جاری تھی۔
