پلوامہ (جموں کشمیر): جنوبی کشمیر کے ضلع پلوامہ میں کلپورہ، لیتر علاقے کے باشندوں بنیادی سہولیات کی عدم دستیابی پر حکام کے خلاف احتجاج کیا۔ لوگوں نے الزام عائد کرتے ہوئے کہا کہ اکیسویں صدی میں بھی ہر چیز ڈیجیٹل ہو رہی ہے لیکن ان کے علاقے میں سڑک، بجلی، طبی سہولیات سمیت دیگر بنیادی ضروریات کے فقدان سے لوگوں کو سخت مشکلات کا سامنا کرنا پڑ رہا ہے۔
احتجاج کر رہے لوگوں نے حکام سے سے اپیل کی وہ اس علاقے کی جانب بھی توجہ مرکوز کریں تاکہ لوگوں کی مشکلات کا ازالہ ممکن ہو سکے۔ لوگوں نے کہا کہ ’’جموں کشمیر کے سبھی اضلاع میں ترقیاتی کام شد و مد شور سے جاری ہیں اور اس بیچ ہمارے پسماندہ علاقے کی طرف بھی توجہ دینے کی ضرورت ہے۔‘‘ اوقاف کمیٹی کلپورہ کے چیئرمین یونس احمد لون نے میڈیا نمائندوں کے ساتھ بات کرتے ہوئے کہا: ’’آج کے تیز رفتار اور ترقی یافتہ دور میں بھی ہمارا علاقہ بنیادی ضروریات کے حصول کے لیے احتجاج کرنے پر مجبور ہے۔‘‘ انہوں نے کہا کہ علاقے سے گزرنے والی سڑک گزشتہ کئی برسوں سے خستہ حالی کی شکار ہے اور بجلی کا ترسیلی نظام بھی درہم برہم ہو چکا ہے، بجلی کی تاریں درختوں اور لکڑی کے عارضی ٹکٹوں پر لٹکی ہوئی ہیں جو عوام کے لیے خطرہ سے کم نہیں ہیں۔
