سرینگر: محکمہ موسمیات کی جانب سے ماہ رواں کے اختتام تک نا موافق موسمی صورتحال کی پیش گوئی کے بیچ وادی کشمیر میں گزشتہ چوبیس گھنٹوں کے دوران بارشیں ہوئیں۔ محکمہ موسمیات کے ایک ترجمان نے بتایا کہ سرینگر میں گزشتہ چوبیس گھنٹوں کے دوران0.1 ملی میٹر بارشیں ریکارڈ ہوئیں جبکہ قاضی گنڈ میں 1.6 ملی میٹر، بانہال میں 2.6 ملی میٹر، کو کرناگ میں 0.6 ملی میٹر، بھدرواہ میں 1.2 ملی میٹر اور بٹوٹ میں 0.7 ملی میٹر بارش ریکارڈ ہوئی ہے۔ وادی کے سیاحتی مقامات گلمرگ اور پہلگام میں بالترتیب 3.4 ملی میٹر اور 4.4 ملی میٹر بارش ریکارڈ ہوئی ہے۔
دریں اثناء، شہرہ آفاق گلمرگ کو چھوڑ کر وادی کے سبھی علاقوں میں شبانہ درجہ حرارت میں مزید اضافہ درج ہوا ہے۔ گرمائی دارلحکومت سرینگر میں کم سے کم درجہ حرارت 9.8 ڈگری سینٹی گریڈ ریکارڈ کیا گیا جہاں گزشتہ شب کا درجہ حرارت9.5 ڈگری سینٹی گریڈ ریکارڈ ہوا تھا۔ وادی کے شہرہ آفاق سیاحتی مقام گلمرگ میں کم سے کم درجہ حرارت 2.0 ڈگری سینٹی گریڈ ریکارڈ کیا گیا جہاں گزشتہ شب کا درجہ حرارت 3.0 ڈگری سینٹی گریڈ ریکارڈ ہوا تھا۔
پہلگام میں کم سے کم درجہ حرارت5.0 ڈگری سینٹی گریڈ ریکارڈ کیا گیا جہاں گزشتہ شب کا درجہ حرارت 4.7 ڈگری سینٹی گریڈ ریکارڈ ہوا تھا۔ شمالی کشمیر کے سرحدی ضلع کپوارہ میں کم سے کم درجہ حرارت 9.5 ڈگری سینٹی گریڈ ریکارڈ کیا گیا جبکہ قاضی گنڈ میں کم سے کم درجہ حرارت 9.8 ڈگری سینٹی گریڈ ریکارڈ کیا گیا۔
یہ بھی پڑھیں: بھاری برفباری کے بعد کشمیر میں معمولات زندگی درہم برہم
ادھر، محکمہ موسمیات کے ایک ترجمان کے مطابق وادی کشمیر میں اگلے چوبیس گھنٹوں کے دوران موسم ابر آلود رہنے کے امکانات ہیں اور اس دوران میدانی علاقوں میں ہلکی بارشیں جبکہ پہاڑی علاقوں میں ہلکی برف باری ہونے کا بھی امکان ہے۔ انہوں نے کہا کہ وادی میں بعد ازاں 29 مارچ کی رات سے 30 مارچ کی شام تک موسم ابر آلود رہنے کے ساتھ پہاڑی علاقوں میں ہلکی بارشوں کا برف باری کا امکان ہے۔ ان کا کہنا تھا کہ بعد میں 31 مارچ سے 5 اپریل تک موسم مجموعی طور پر خشک رہنے کی توقع ہے۔
یو این آئی
