اننت ناگ: ضلع اننت ناگ کی اہم شاہراہوں پر ریڑھی والوں اور خوانچہ فروشوں نے غیر قانونی قبضہ کرکے نہ صرف راہگیروں بلکہ ٹریفک کی نقل حمل میں رکاوٹیں کھڑی کی ہیں۔
ریڑھی والوں نے قصبہ اننت ناگ کے مصروف ترین جگہوں خاص کر لال چوک، گانجی واڑہ، مٹن چوک کے ایم ڈی، کورٹ روڈ و دیگر مقامات کی سڑکوں پر قبضہ کر رکھا ہے، جس کی وجہ سے راہگیروں کو کافی مشکلات کا سامنا کرنا پڑتا ہے۔
وہیں ریڑھی والوں کی وجہ سے روزانہ شدید ٹریفک جام ہو رہا ہے، جس کے نتیجہ میں مریضوں کو گورنمنٹ میڈیکل کالج اور ایم سی سی ایچ ہسپتال لے جانے یا ریفر کرنے میں کافی دشواریاں پیش آرہی ہیں۔
اگرچہ ضلع انتظامیہ کی جانب سے گزشتہ برس گنجان مقامات پر موجود کئی سومو اسٹینڈز کو دوسری جگہوں پر منتقل کیا گیا تھا، تاکہ قصبہ میں ٹریفک کے دباؤ کو کم کیا جائے اور ٹریفک کی نقل و حمل کو آسان بنایا جا سکے۔ تاہم خوانچہ فروشوں کے غیر قانونی قبضہ کو ہٹانے کے لئے اقدامات نہیں اٹھائے جا رہے ہیں، جس کی وجہ سے سڑکوں پر ابتر صورت حال دیکھنے کو مل رہی ہے۔
مزید پڑھیں: چھاپڑی فروشوں کے غیر قانونی قبضہ سے لوگ پریشان
مقامی لوگوں کا کہنا ہے کہ انتظامیہ کی جانب سے اس سلسلہ میں غیر سنجیدگی کا مظاہرہ کیا جا رہا ہے، جس کا خمیازہ عام عوام کو بھگتنا پڑتا ہے۔ لوگوں نے انتظامیہ سے اس سلسلہ میں ٹھوس اقدامات اٹھانے کی اپیل کی۔
