سرینگر (جموں کشمیر) : عام آدمی پارٹی (عآپ) کے رکن اسمبلی معراج ملک نے جمعہ کو جموں و کشمیر کی اسمبلی میں بھارتیہ جنتا پارٹی (بی جے پی) پر الزام عائد کیا ہے کہ جموں و کشمیر کے چناب ویلی اور پیر پنجال خطے میں مرکزی حکومت نے لوگوں کو بغیر تربیت کے ہی ہتھیار فراہم کیے جس کے نتیجے میں کشتواڑ میں حالیہ ہلاکتیں ہوئیں۔
اسمبلی میں خطاب کرتے ہوئے ملک نے کہا کہ ’’بی جے پی نے سیاسی فائدے کے لیے اور ہندوتوا کے نام پر لوگوں کو ہتھیار دیے جو کہ مہلک ثابت ہوئے۔‘‘ انہوں نے سوال کیا کہ ’’کیا کشتواڑ میں مارے جانے والے افراد کو ہتھیار چلانا آتا تھا؟ کیا وہ نشانہ لگا سکتے تھے؟ ایم ایل اے نے بی جے پی پر الزام عائد کیا کہ اس نے ’سیدھے سادے، بھولے بھالے لوگوں‘ کو الیکشن میں فائدہ کے لیے ہتھیار فراہم کیے، جس کا نتیجہ کشتواڑ جیسے ’’افسوسناک حادثے‘‘ کی صورت میں نکلا۔‘‘ انہوں نے مزید کہا کہ بی جے پی کے ایم ایل ایز کو، جن کے حلقوں میں یہ ہلاکتیں ہوئیں، آج اس پر بات کرنی چاہیے تھی، لیکن وہ انتشار پھیلانے میں مصروف رہے۔
ملک نے بی جے پی کی دو ایم ایل ایز، جو کہ کشتواڑ سے ہیں، خاص طور پر اپوزیشن لیڈر سنیل کمار شرما اور کشتواڑ کے ایم ایل اے شگن پاریہار کو تنقید کا نشانہ بناتے ہوئے کہا کہ وہ ہتھیار فراہم کرنے کے عمل پر جوابدہ ہیں۔ ملک نے مطالبہ کیا کہ ’’بی جے پی اور متعلقہ حکام بتائیں کہ کتنے ہتھیار تقسیم کیے گئے اور ناتجربہ کار افراد کو کیوں دیے گئے۔‘‘ دوسری طرف پی ڈی پی کے رکن اسمبلی محمد رفیق نائیک نے کہا کہ کشمیریوں کو ’’علیحدگی پسند، دہشت گرد، اور پاکستانی‘‘ جیسے القاب دینا بند کیا جائے اور ان کے خلاف منفی رویہ ترک کیا جائے۔‘‘
یہ بھی پڑھیں: کشتواڑ میں عسکریت پسندوں نے دو وی ڈی جی کو ہلاک کردیا، جنگلاتی علاقہ میں بڑے پیمانہ پر سرچ آپریشن جاری
