بڈگام میں گیزر میں دھماکہ، ایک فرد ہلاک، دو زخمی - Geyser Explosion in Budgam

Geyser Explosion in Budgam: بڈگام میں گیزر پھٹنے کا ایک حادثہ پیش آیا جہاں اس واقعہ میں ایک شخص ہلاک ہو گیا، جب کہ اس کی بیوی اور کمسن بیٹا زخمی ہوگئے۔ پولیس نے اس سلسلہ میں ایک کیس درج کرتے ہوئے کارروائی کا شروع کر دی ہے۔

بڈگام: وسطی کشمیر کے ضلع بڈگام میں آج بدھ کی صبح ایک دلدوز سانحہ میں گیزر پھٹنے کے نتیجہ میں ایک شخص کی موت واقع ہو گئی ہے جب کہ اس حادثہ میں مذکورہ شخص کی بیوی اور کمسن بیٹا زخمی ہو گئے ہیں۔ ایک اہلکار نے بتایا کہ بدھ کی صبح بڈگام کے علاقے نارکرہ میں ایک المناک حادثہ پیش آیا جس میں پانی گرم کرنے کا گیزر پھٹنے سے ایک زوردار دھماکہ ہوا ہے۔ جس کے نتیجہ میں ایک ہی خاندان کے تین افراد زخمی ہوئے ہیں۔ تاہم تمام زخمیوں کو فوری طور پر قریبی اسپتال لے جایا گیا جہاں پر خاندان کے ایک فرد نے زخموں کی تاب نہ لاتے ہوئے دم توڑ دیا۔

ایک اہلکار نے مرنے والے کی شناخت منظور احمد ڈار کے طور پر کی ہے۔ وہیں ان کے خاندان کے دو زخمی افراد کی شناخت منظور احمد ڈار کی اہلیہ زاہدہ بیگم اور ان کے چھوٹے بیٹے علی محمد ڈار کے نام سے ہوئی ہے۔ بڈگام پولیس کی ایک پولیس پارٹی جائے موقع پر پہنچ گئی ہے اور اس حادثہ کا سنجیدہ نوٹس لیتے ہوئے تفتیش شروع کر دی ہے۔ اس ضمن میں ایک مقدمہ بھی درج کیا گیا ہے۔ اس سلسلہ میں حکام نے بتایا کہ بدھ کی صبح وسطی کشمیر کے ضلع بڈگام میں ایک سانحہ میں ایک گیزر پھٹنے کے نتیجہ میں ایک شخص کی موت ہو گئی جب کہ اس کے کمسن بیٹے سمیت خاندان کے دو دیگر افراد زخمی ہو گئے۔