سرینگر : الیکشن کمیشن آف انڈیا نے منگل کو جموں و کشمیر کی 24 اسمبلی سیٹوں کے لیے نوٹیفکیشن جاری کردیا جہاں 18 ستمبر کو ووٹنگ ہوگی۔ ای سی آئی نے انتخابی نوٹیفکیشن اس وقت جاری کیا جب لیفٹیننٹ گورنر نے ایک علیحدہ نوٹیفکیشن میں ان 24 حلقوں میں سے ہر ایک سے جموں و کشمیر قانون ساز اسمبلی کے اراکین کو عوامی نمائندگی ایکٹ 1951 کی دفعات کے مطابق منتخب کرنے کا مطالبہ کیا۔
پولنگ باڈی نے پامپور، ترال، پلوامہ، راجپورہ، زینا پورہ، شوپیاں، ڈی ایچ پورہ، کولگام، دیوسر، ڈورو، کوکرناگ (ایس ٹی)، اننت ناگ ویسٹ، اننت ناگ، سری گفوارہ—بجبہاڑہ، شنگس—اننت ناگ ایسٹ، پہلگام، اندروال، کشتواڑ، پیڈر - ناگسینی، بھدرواہ، ڈوڈا، ڈوڈا ویسٹ، رامبن اور بانہال اسمبلی حلقوں پر انتخابات کےلئے نوٹیفیکیشن جاری کردیا۔
ای سی آئی کے نوٹیفکیشن کے مطابق، امیدوار ان نشستوں کے لیے 27 اگست تک کاغذات نامزدگی داخل کر سکتے ہیں جبکہ کاغذات نامزدگی کی جانچ پڑتال 28 اگست کو کی جائے گی۔ ای سی آئی کے نوٹیفکیشن سے پہلے، جموں و کشمیر کے لیفٹیننٹ گورنر نے ایک علیحدہ نوٹیفکیشن جاری کیا جس میں ان 24 حلقوں کے ووٹرز سے کہا گیا کہ وہ جموں و کشمیر قانون ساز اسمبلی کے ممبران کو عوامی نمائندگی ایکٹ 1951 کی دفعات کے مطابق منتخب کریں۔
یہ بھی پڑھیں: التجا مفتی جموں و کشمیر اسمبلی انتخابات میں بجبہاڑہ سیٹ سے میدان میں - Iltija Mufti Makes Electoral Debut
یونین ٹیریٹری میں انتخابات تین مرحلوں میں ہوں گے، دوسرا مرحلہ 25 ستمبر کو ہوگا جس میں 26 سیٹوں پر پولنگ ہونی ہے اور تیسرا اور آخری مرحلہ یکم اکتوبر کو ہوگا جس کے تحت 40 سیٹوں پر انتخابات ہونے والے ہیں۔ جموں و کشمیر میں 2014 آخری بار انتخابات ہوئے تھے تاہم اب 10 سال بعد اسمبلی انتخابات منعقد ہورہے ہیں۔ 2014 میں پی ڈی پی اور بی جے پی نے مخلوط حکومت بنائی جو 19 جون 2018 تک جاری رہی جب بی جے پی نے پی ڈی پی کی حمایت واپس لے لی جبکہ محبوبہ مفتی جموں و کشمیر کی وزیر اعلیٰ تھیں۔ جموں و کشمیر کو گورنر کے زیر انتظام صدر راج کے تحت رکھا گیا۔ 5 اگست 2019 کو، بی جے پی حکومت نے آرٹیکل 370 کو ختم کر دیا اور ریاست کو دو مرکز کے زیر انتظام علاقوں میں تقسیم کر دیا۔ تب سے UT کا انتظام ایک LG اور اس کے اکیلے مشیر کے زیر انتظام ہے۔
