جموں: سائبر سیل جموں نے کافی کوشش کے بعد دھوکہ دہی کے شکار ایک شخص کو 50 ہزار روپے واپس کر دیے۔ شکایت کنندہ نے فون پر سائبر ٹھگ کو اپنی ذاتی معلومات دی تھیں۔ اس کے بعد فراڈیے نے اس کے بینک اکاؤنٹ سے 50 ہزار روپے نکال لیے۔ تفصیلات کے مطابق بشنہ کے رہنے والے روہت کھجوریا نے ضلع پولیس کے سائبر سیل میں شکایت درج کرائی تھی کہ ان کے موبائل فون پر ایک نامعلوم شخص نے کال کی تھی اور بات چیت کے دوران اس نے اپنی اہم معلومات انہیں دی تھیں۔ نامعلوم شخص سے بات کرتے ہوئے اس کے بینک اکاؤنٹ سے 50 ہزار روپے نکلوا لیے گئے۔
ضلع پولیس کے سائبر سیل نے شکایت پر فوری کارروائی کرتے ہوئے جس بینک اکاؤنٹ میں رقم گئی تھی اس کی ادائیگی روک کر شکایت کنندہ کے بینک اکاؤنٹ میں واپس کردی۔ ایس ایس پی جموں ونود کمار نے لوگوں کو سائبر ٹھگوں سے ہوشیار رہنے کا مشورہ دیا ہے۔ انہوں نے کہا کہ سائبر فراڈ کی صورت میں لوگ فوری طور پر ہیلپ لائن نمبر 1930 یا 8899537995 پر رابطہ کریں۔ اس کے علاوہ لوگ www.cybercrime.gov.in پر آن لائن شکایت درج کر سکتے ہیں اور موبائل کے گم ہونے کی صورت میں وہ www.ceir.gov سے رابطہ کر سکتے ہیں۔
قابل ذکر ہے کہ اس سے قبل بھی موبائل فون سے کال کرکے اور ان کی ذاتی معلومات لے کر لوگوں کے کھاتوں سے رقم نکلوائی جا چکی ہے۔ پولیس بھی اس سلسلے میں وقتاً فوقتاً لوگوں کو آگاہ کرتی رہتی ہے۔ اس کے بعد بھی ایسے واقعات رک نہیں رہے ہیں۔ ایس ایس پی کا کہنا ہے کہ اگر لوگ احتیاط کریں اور کبھی بھی اپنی ذاتی معلومات نامعلوم افراد سے شیئر نہ کریں تو ایسے واقعات سے بچا جا سکتا ہے۔
