بی جے پی کے ساتھ میں ہی کشمیر کی ترقی کا راز مضمر: بشیر میر

بی جے پی ساتھ اپنے سیاسی سفر کا آغاز کرنے والے ترال علاقہ کے سیاسی کارکن بشیر میر نے کہا کہ انہوں نے سوچ سمجھ کر ہی بی جے پی کا ہاتھ تھاما ہے۔

پلوامہ (جموں کشمیر) : ’’بھارتیہ جنتا پارٹی (بی جے پی) ہی واحد ایسی سیاسی جماعت ہے جو کشمیر کو ہر سطح کے دلدل سے نکال کر یہاں جامع ترقی کا خواب پورا کر سکتی ہے، مقامی اور سابق سیاسی جماعتوں نے علاقہ ترال کو ہمیشہ نظر اندز کیا۔‘‘ ان خیالات کا اظہار محکمہ جیالوجی اینڈ مایننگ کے سابق آفیسر بشیر احمد میر نے بھارتیہ جنتا پارٹی میں شمولیت کے بعد ای ٹی وی بھارت کے ساتھ بات کرتے ہوئے کیا۔ انہوں نے دعویٰ کیا کہ سیاست اور سماجی خدمت کا شوق انہیں بچپن سے ہی تھا، سرکاری نوکری کے دوران وہ یہ شوق پورا نہیں کر سکے لیکن اب وقت آنے پر انہوں نے اپنے سیاسی سفار کا آغاز کیا ہے۔

یہ پوچھے جانے پر کہ بی جے پی کے ساتھ ہی سیاسی اننگ کا آغاز کیوں کیا؟ بشیر احمد نے جواب میں کہا: ’’کیونکہ دیگر سیاسی پارٹیوں نے آج تک کشمیری قوم کا استحصال کیا ہے اور یہی وجہ ہے کہ اپنے حامیوں کے اصرار پر میں نے بی جے پی سے سیاسی کیریر کا آغاز کیا ہے کیونکہ یہ پارٹی عوام کی آواز بن کر ابھری ہے۔ جبکہ ترال علاقے میں بھی گزشتہ برسوں کے دوران علاقائی پارٹیز نے بھی کوئی خاص کام کیا نہیں ہے اور صرف عوام کو سبز باغ دکھاتے رہے لیکن اب وقت آگیا ہے کہ اس علاقے کو پسماندگی سے نکال باہر کیا جائے۔‘‘

ای ٹی وی بھارت کے ساتھ گفتگو کے دوران بشیر میر نے بتایا کہ ’’نریندر مودی کی زیر قیادت بی جے پی، پنچایتی نظام کو زمینی سطح پر بہتر بنانے کے لیے اقدامات کر رہی ہے۔‘‘ انہوں نے مزید بتایا کہ وہ ترال کی جامع ترقی کے خواب کو پورا کرنے کے لیے باضابطہ ایک مہم چھیڑیں گے تاکہ عوام کو راحت مل سکے۔ واضح رہے کہ بشیر احمد میر نے اتوار کو ٹاؤن ہال ترال میں اپنے حامیوں کے ساتھ بی جے پی میں شمولیت کی۔