بی جے پی نے ہمیشہ نفرت کی سیاست کی ہے: ڈاکٹر فاروق عبداللہ - Dr Farooq Abdullah

BJP has always done politics of hate جموں و کشمیر کے اننت ناگ میں نیشنل کانفرنس کے صدر ڈاکٹر فاروق عبداللہ نے ایک انتخابی ریلی سے خطاب کیا۔ انہوں نے اس موقع پر بی جے پی کو شدید تنقید کا نشانہ بنایا۔ فاروق عبداللہ نے کہا کہ بی جے پی ہمیشہ نفرت کی سیاست کرتی رہی ہے۔

اننت ناگ: نیشنل کانفرنس کی جانب سے ضلع اننت ناگ کے شانگس علاقہ میں ورکرس کنونشن کا انعقاد کیا گیا، جس میں نیشنل کے صدر ڈاکٹر فاروق عبداللہ ،اننت ناگ راجوری پارلیمانی نشست کے امیدوار میاں الطاف احمد لاروی،عبدالمجید لارمی بشیر احمد ویری سمیت ورکرس کی بڑی تعداد موجود رہی۔ اس موقع پر ورکرس سے خطاب کے دوران ڈاکٹر فاروق عبداللہ نے کہا کہ بی جے پی نے ہمیشہ مذہب کی سیاست کی ہے اور آج بھی وہ اسی راستہ پر گامزن ہے۔ انہوں نے کہا کہ بھارت ایک سیکیولر ملک ہے اور یہ دنیا کا ایسا ایک واحد ملک ہے جہاں پر ہر مذہب کے لوگ مل جھل کر رہتے ہیں ،لیکن بی جے پی نے اپنے سیاسی مفادات کے لیے مذہبی ہم آہنگی اور آپسی بھائی چارہ کو تہس نہس کرنے کی کوشش کی ہے۔

ڈاکٹر فاروق نے کہا کہ بی جے پی نے ملک میں نفرت کا بیج بویا ہے اور آج بھی ملک کے وزیر اعظم خاص کر مسلمانوں کے خلاف زہر پھیلا رہے ہیں۔ ماضی میں گائے ،گوشت ، تین طلاق جیسے معاملات پر مسلمانوں کو ٹارگیٹ کیا گیا اور آج منگل سوتر چھینے جیسی باتیں کرکے ایک بار پھر ہندؤں کو مسلمانوں کے خلاف بھڑکایا جارہا ہے۔ ڈاکٹر فاروق نے کہا کہ ملک کے تمام مسلمان اور اقلیتی طبقے بی جے پی کے ظلم و ستم سے تنگ آچکے ہیں، لیکن اب بی جے پی کے پاس زیادہ دن نہیں رہے اور وہ وقت آگیا جب ملک کو بی جے پی کی حکمرانی سے آزادی ملے گی۔