اننت ناگ: بھارتیہ جنتا پارٹی کے سینئر لیڈر اور سہ پربھاری رفیق وانی نے اننت ناگ 43 ویسٹ سے کاغذات نامزدگی داخل کیا ہے۔ اس موقعے پر ان کے ہمراہ سیکڑوں کارکنان کھنہ بل سے ڈی آفس تک رقص کرتے نظر آئے۔ کارکنان میں کافی جوش دیکھنے کو ملا۔ اس موقعے پر رفیق وانی نے لوگوں سے خطاب کرتے ہوئے بھاری اکثریت سے کامیاب بنانے کی اپیل کی۔ انہوں نے میڈیا کے نمائندوں سے بات کرتے ہوئے کہا کہ لوگ گزشتہ دس برسوں سے اسمبلی انتخابات کا بڑی بے صبری سے انتظار کر رہے تھے۔ اب وقت آگیا ہے جب لوگ اپنے نمائندے کو بھاری اکثریت سے کامیاب کریں گے۔
انہوں نے دعویٰ کیا کہ کشمیر میں پہلی سیٹ اننت ناگ ویسٹ کی ہوگی جو بھارتیہ جنتا پارٹی کے حق میں ہوگی۔ انہوں نے کہا کہ اس بار لوگوں نے عہد کیا ہے کہ وہ بھارتیہ جنتا پارٹی کو کامیاب بنائیں گے۔
رفیق وانی نے مزید کہا کہ بھارتیہ جنتا پارٹی عوام دوست پارٹی ہے اور جس طرح آج راشن مفت مل رہا ہے، آنے والے وقت میں بجلی اور پانی بھی مفت فراہم کیا جائے گا۔ انہوں نے لوگوں سے اپیل کرتے ہوئے کہا کہ وہ ان کے حق میں اپنا قیمتی ووٹ دے کر بھارتیہ جنتا پارٹی کے امیدوار کو کامیاب بنائیں۔
