سرینگر (جموں و کشمیر): کالعدم تنظیم جماعت اسلامی نے اپنے چار اراکین کو آزاد امیدوار کی حیثیت سے میدان میں اتارا ہے۔ اس نے وادی کشمیر کے ضلع کولگام میں اپنی پہلی انتخابی ریلی کا انعقاد کیا۔ ریلی میں تنظیم کے ہزاروں کارکنوں، حامیوں اور اس پینل نے شرکت کی جس نے حکومت سے الیکشن لڑنے کے بارے میں بات چیت کی تھی۔
جماعت اسلامی نے پلوامہ، کولگام، دیوسار میں تین امیدوار کھڑے کیے ہیں اور زین پورہ سیٹ پر پی ڈی پی کے سابق ایم ایل اے اعجاز احمد میر کی حمایت کر رہے ہیں۔ کالعدم جماعت اسلامی کے رہنماؤں نے کارکنوں پر زور دیا کہ وہ آزاد امیدواروں کے لیے ریلیاں نکالیں اور اسمبلی انتخابات میں ان کے لیے مہم چلائیں۔
ضلع کولگام کے گاؤں بُگام میں ہونے والی ریلی میں جماعت اسلامی ہند کے حامیوں اور کارکنوں کا زبردست اور پرجوش ہجوم دیکھنے کو ملا۔ کشمیر میں بُگام گاؤں کو جماعت اسلامی کا گڑھ سمجھا جاتا ہے۔ ریلی سے خطاب کرتے ہوئے پینل کے مشیر شمیم احمد ٹھوکر نے کہا کہ وہ عوام کے مسائل کو آئین ہند کے دائرہ کار میں اٹھائیں گے اور حقوق کی بات کریں گے۔
ٹھوکر نے ریلی سے خطاب کرتے ہوئے کہا کہ "ہم بھارت کے آئین کی پیروی کریں گے لیکن، لوگوں کے حقوق کے بارے میں بات کرنے سے پیچھے نہیں ہٹیں گے۔ ہم امن کے پرچارک اور حامی ہیں۔ آپ کو ہمارا ساتھ دینا ہوگا۔"
ٹھوکر نے ریلی سے خطاب کرتے ہوئے اپنی بات عوام کے سامنے رکھی اور انہیں زبردست ردعمل ملا۔ فروری 2019 میں، حکومت ہند نے پلوامہ میں سی آر پی ایف کے قافلے پر خودکش حملے کے بعد غیر قانونی سرگرمیاں ایکٹ کے تحت جماعت اسلامی پر پابندی لگا دی تھی۔ پابندی ہٹانے کے لیے مرکز پر زور دیتے ہوئے کالعدم تنظیم کے ایک پینل نے الیکشن لڑنے پر اپنی رضامندی ظاہر کی۔ اس کے بعد وادی میں کچھ سیٹوں پر آزاد امیدوار کھڑے کیے۔
یہ بھی پڑھیں:
بُگام ریلی 1987 کے انتخابات کے بعد یہ ان کی پہلی انتخابی ریلی تھی جب تنظیم نے 1987 کے انتخابات میں دھاندلی کا الزام لگاتے ہوئے جموں و کشمیر میں انتخابات کا بائیکاٹ کرنے کا فیصلہ کیا تھا۔ تنظیم کے ارکان جو جیل سے باہر ہیں انہوں نے جماعت اسلامی کے ایک سینئر رکن غلام قادر وانی کی سربراہی میں ایک پینل تشکیل دیا تھا جو اپنی پارٹی کے صدر الطاف بخاری کے ذریعے اسمبلی انتخابات میں حصہ لینے اور پابندی ہٹانے کے لیے حکومت کے ساتھ مذاکرات کی قیادت کر رہے ہیں۔
