ترال:مرکز کے زیر انتظامیہ جموں و کشمیر کے تمام اضلاع میں عوامی دربار(بلاک دیوس) کے انعقاد کا سلسلہ جاری ہے۔ضلع پلوامہ کے ترال کے سیرجاگیر میں ضلع انتظامیہ کی جانب سے عوامی دربار(بلاک دیوس) کا اہتمام کیا گیا جس کی صدارت اے ڈی سی ترال ساجد نقاش نے کی جبکہ تحصیلدار آری پل ثاقب رشید کے علاوہ عوام کی ایک بڑی تعداد نے شمولیت کی بلاک دیوس میں سب ضلع سطح کے اعلیٰ افسران بھی موجود تھے۔
بلاک دیوس کے موقع پر عوامی وفود نے اپنے اپنے مسائل انتظامیہ کے نوٹس میں لائے اور ان کے فوری ازالے کا مطالبہ کیا۔اے ڈی سی نے موقع پر ہی کئی معاملات کو حل کیا جبکہ دیگر معاملات کو مرحلہ وار طریقے پر حل کرنے کی بھی یقین دہانی کرائی۔ مقامی لوگوں نے بتایا بلاک دیوس کے دوران انہوں نے متعدد مسائل متعلقہ افسران کی نوٹس میں لائے اور انہیں امید ہے کہ لوگوں کو درپیش مسائل کا جلد ازالہ کیا جائے گا۔
یہ بھی پڑھیں:بارہمولہ میں عوامی دربار کا انعقاد
اے ڈی سی ترال ساجد نقاش نے میڈیا کو بتایا کہ عوامی دربار کے انعقاد کا مقصد حکومت کی عوام کے گھروں تک پہنچناہے۔اس منصوبے کی بدولت عام لوگوں کے مسائل کرنا ہی ہمارا بنیادی مقصد ہے۔سیرجاگیر میں منعقدہ بلاک دیوس کے دوران مقامی باشندوں کے مسائل کو سنجیدگی سے لیا گیا۔ان کے مسائل کو جلد سے جلد حل کرنے کی کوشش کی جائے گی۔
