اننت ناگ: امرناتھ یاترا سخت حفاظتی انتظامات کے درمیان بالتل اور پہلگام کے راستوں سے جاری ہے۔ 3740 یاتریوں کا تازہ دستہ امرناتھ یاترا کے لیے جموں کے بھگوتی نگر یاتری نواس سے بدھ کی صبح امرناتھ مقدس گپھا کی طرف روانہ ہوا۔ گزشتہ روز پہنچے ہوئے یاتریوں کے 19ویں قافلے نے بالتال اور نُنون کے بیس کیمپس سے جنوبی کشمیر کے ہمالیائی پہاڑیوں میں 3880 میٹر بلندی پر واقع گپھا کے درشن کے لیے علی الصبح اپنا سفر شروع کیا۔
یہ بھی پڑھیں:
ایک عہدیدار نے بتایا کہ سخت ترین سکیورٹی انتظامات کے بیچ 20ویں دن 3740 یاتری 127 گاڑیوں میں جموں کے بھگوتی نگر یاتری نواس سے پہلگام اور بالتل بیس کیمپوں تک پہنچنے کے لیے وادیٔ کشمیر میں امرناتھ مقدس گپھا کے درشن کے لیے روانہ ہوئے۔ سرکاری اعداد و شمار کے مطابق 29 جون کو امرناتھ یاترا کے آغاز کے بعد سے اب تک 338227 یاتریوں نے مقدس گپھا کے درشن کیے جب کہ منگل کے روز 13132 یاتریوں نے گپھا میں درشن کیا۔
بدھ کی علی الصبح جموں سے وادی کی جانب روانہ ہونے والے یاتریوں میں 1880 مرد، 375 خواتین، 5 بچے، 39 سادھو اور 06 سادھوی شامل ہیں، جن میں بالتال ٹریک سے 1435 یاتری اور 2305 یاتری بالترتیب 55 اور 72 گاڑیوں میں سوار تھے۔ واضح رہے کہ 52 روز پر مشتمل امرناتھ یاترا 29 جون سے شروع ہوئی جو 19 اگست تک جاری رہے گی۔
