سری نگر: سماج وادی پارٹی کے سربراہ اکھلیش یادو نے منگل کو جموں اور کشمیر کے لئے مکمل ریاستی حیثیت اور خوشحالی کا مطالبہ کیا۔ اکھیلیش یادو عمر عبداللہ کی حلف برداری تقریب میں شرکت کے لئے سری نگر پہنچے ہیں۔عمر عبداللہ کی حلف برداری تقریب 16 اکٹوبر کو ہے۔
سری نگر میں نامہ نگاروں سے بات کرتے ہوئے یادو نے ریاست کا درجہ بحال کرنے اور سرحدی علاقے کی ترقی کے لیے خصوصی مواقع کو یقینی بنانے کی اہمیت پر زور دیا۔
اکھیلیش نے سری نگر کے شیر کشمیر بین الاقوامی ہوائی اڈے پر نامہ نگاروں کو بتایا، "جموں و کشمیر کے لوگوں نے جمہوریت میں یقین کیا ہے اور اپنی حکومت کو منتخب کر کے آئین کو بچایا ہے۔اگلا مرحلہ انہیں مکمل ریاست کا درجہ دینا ہے۔ مجھے یقین ہے کہ جس طرح سے لوگوں نے یہاں ووٹ دیا ہے، وہ مستقبل میں اس مقصد کو حاصل کر لیں گے۔"
یادیو، جو عمر عبداللہ کی تقریب حلف برداری میں شرکت کے لیے سری نگر پہنچے، چنا پورہ کے ایم ایل اے مشتاق گرو نے ان کا استقبال کیا۔ انہوں نے نیشنل کانفرنس کی زبردست جیت پر ڈاکٹر فاروق عبداللہ کو مبارکباد دی اور عمر عبداللہ کی قیادت پر اعتماد کا اظہار کیا۔ انہوں نے کہا کہ مجھے پورا بھروسہ ہے کہ عمر عبداللہ اپنی ذمہ داریوں کو بخوبی نبھائیں گے اور جموں و کشمیر کو خوشحالی کی طرف لے جائیں گے۔
عمر عبداللہ کی کابینہ بدھ کو ڈل جھیل کے کنارے واقع شیر کشمیر انٹرنیشنل کنونشن سینٹر میں حلف لے گی۔ جموں و کشمیر ری آرگنائزیشن ایکٹ کے مطابق وزیر اعلیٰ سمیت وزراء کی کونسل 90 رکنی اسمبلی کے 10 فیصد تک محدود ہو گی۔ اس کا مطلب ہے کہ عمر عبداللہ کی حکومت میں نو وزیر ہوں گے۔
ایک سرحدی علاقے کے طور پر جموں اور کشمیر کے لیے خصوصی انتظامات کی ضرورت کو دہراتے ہوئے، یادو نے کہا کہ "ملک تب ہی ترقی کرے گا جب جموں و کشمیر خوشحالی کی راہ پر گامزن ہو گا۔" انہوں نے کہا کہ سرحدی ریاستوں کو خصوصی مواقع اور خصوصی سہولیات دی جانی چاہئیں تاکہ ان کی مسلسل ترقی کو یقینی بنایا جا سکے۔
