واشنگٹن: ریپبلکن پارٹی کی جانب سے وائٹ ہاؤس کے ممکنہ امیدوار ڈونلڈ ٹرمپ نے جے ڈی وینس کو نائب صدر کے عہدے کے لیے اپنا امیدوار بنایا ہے۔ 39 سالہ وینس ٹرمپ سے 40 سال چھوٹے ہیں اور انہیں امریکی فوج میں کام کرنے کا تجربہ ہے۔ لیکن وہ سیاست میں نئے ہیں اور 2022 میں امریکی سینیٹ کے لیے منتخب ہوئے تھے۔
وہ ایک مصنف بھی ہیں۔ انھوں نے 2016 میں اپنی خود نوشت ہلبلی ایلیگی "Hillbilly Elegy" کی اشاعت کے ساتھ قومی شہرت حاصل کی، جو اس وقت شائع ہوئی جب ٹرمپ پہلی بار صدر کے لیے انتخاب لڑ رہے تھے۔ یہ کتاب ایک محنت کش امریکی خاندان میں پرورش پانے کے بارے میں ہے۔
ٹرمپ نے اپنے سوشل میڈیا پلیٹ فارمز پر لکھا کہ طویل غور و فکر اور بہت سے دوسرے لوگوں کی آراء پر غور کرنے کے بعد، میں نے فیصلہ کیا ہے کہ امریکہ کے نائب صدر کا عہدہ سنبھالنے کے لیے سب سے موزوں شخص اوہائیو کے سینیٹر جے ڈی وینس ہیں۔
انہوں نے مزید کہا، "جے ڈی نے میرین کور میں ہمارے ملک کی خدمت کی، انھوں نے اوہائیو اسٹیٹ یونیورسٹی اور ییل لا اسکول سے گریجویشن کیا، جہاں وہ ییل لا جرنل کے ایڈیٹر اور ییل لا ویٹرنز ایسوسی ایشن کے صدر تھے۔جے ڈی کی کتاب ہمارے ملک کے محنتی مردوں اور عورتوں کی تعریف میں لکھی گئی تھی۔ اگرچہ یہ کتاب بیسٹ سیلر تھی، اس پر بعض اوقات دیہی زندگی کو آسان بنانے اور جدید سیاست میں نسل پرستی کے کردار کو نظر انداز کرنے پر تنقید کا نشانہ بنایا گیا۔
ان کا ٹیکنالوجی اور فنانس میں بہت کامیاب کاروباری کیریئر رہا ہے اور اب اس مہم کے دوران، ان کی توجہ ان لوگوں پر مرکوز رہے گی جن کے لیے وہ لڑے تھے۔انھوں نے امریکی کارکنوں اور پنسلوانیا، مشی گن، وسکونسن، اوہائیو، مینیسوٹا کے کسانوں کے لیے جدوجہد کی۔
وینس کی شادی بھارتی نژاد امریکی اوشا چلوکوری سے ہوئی۔ اوشا چلوکوری وینس کے والدین کا تعلق آندھرا پردیش سے ہے، جو دہائیوں قبل امریکہ ہجرت کر گئے تھے۔ امریکہ میں پیدا اور پرورش پانے والی اوشا ایک کامیاب وکیل ہیں۔ انہوں نے سپریم کورٹ کے چیف جسٹس جان رابرٹس کے لیے کام کیا۔ وہ سان ڈیاگو، کیلیفورنیا میں پلی بڑھیں۔ وہ ییل یونیورسٹی گئی اور اپنے شوہر کی طرح ییل لا اسکول سے گریجویشن مکمل کیا۔
وینس سے توقع ہے کہ وہ محنت کش طبقے کے ووٹروں میں ٹرمپ کی سوچ اور اپیل کو فروغ دیں گے، جس کا پس منظر انھوں نے اپنی کتاب"Hillbilly Elegy" میں بیان کیا ہے۔ سان فرانسسکو میں وینچر کیپیٹل میں کام کرتے ہوئے انہوں نے اچھے رابطے بنائے تھے جو اب ٹرمپ کی انتخابی مہم کے دوران کارآمد ثابت ہوں گے۔
اگرچہ وینس ہمیشہ ٹرمپ کے حامی نہیں تھے، وہ ٹرمپ کے ناقد بھی رہے ہیں۔ ٹرمپ کے سیاسی کیریئر کے ابتدائی مراحل کے دوران وینس نے انہیں امریکہ کا ہٹلر قرار دیا اور کہا کہ وہ ٹرمپ کے لیے کبھی کام نہیں کریں گے۔ لیکن بہت سے ریپبلکنز کی طرح وینس نے بھی اپنا لہجہ بدل لیا اور وہ ٹرمپ کے سب سے بڑے حمایتی بن گئے۔
وہ 2022 میں سینیٹ کے لیے منتخب ہوئے اور اس کے بعد سے وہ سابق صدر کے "میک امریکہ گریٹ اگین" کے ایجنڈے کے سخت ترین حمایتی بن گئے ہیں۔ ٹرمپ پر قاتلانہ حملے کے بعد انہوں نے صدر جو بائیڈن کو اس کا ذمہ دار ٹھہرایا۔
انھوں نے ایکس پر لکھا بائیڈن کی انتخابی مہم کی بنیادی بات یہ رہی ہے کہ ٹرمپ ایک آمرانہ فاشسٹ ہیں۔جسے ہر حال میں روکا جانا چاہیے، اسی بیان بازی کی وجہ سے ٹرمپ پر قاتلانہ حملہ کیا گیا۔
