دمشق: شام نے بین الاقوامی برادری (آئی سی) سے شہریوں پر اسرائیلی حملے بند کرنے کی اپیل کی ہے۔ شام کی وزارت خارجہ نے یہ بات دمشق پر اسرائیلی فضائی حملے کے بعد ایک بیان میں کہی۔ اس حملے میں کم از کم پانچ افراد مارے گئے۔ وزارت نے ایک بیان میں کہا کہ ’’شام بین الاقوامی برادری سے اپیل کرتا ہے کہ وہ صہیونی ادارے کی طرف سے معصوم شہریوں کے خلاف کیے جانے والے جرائم اور قتل عام کو روکنے کے لیے فوری اقدامات کرے۔‘‘
ایرانی میڈیا نے ہفتے کے روز اطلاع دی ہے کہ دمشق پر اسرائیلی فضائی حملے میں ایران کے اسلامی انقلابی گارڈ کور (آئی آر جی سی) کے پانچ فوجی مشیر مارے گئے، جن میں قدس فورس انٹیلی جنس سروس کے ایک کمانڈر بھی شامل تھا۔ شامی وزارت دفاع نے کہا کہ حملے کے نتیجے میں متعدد شہری بھی ہلاک اور زخمی ہوئے۔
شامی فوج نے کہا کہ مغربی دمشق کے قریبی محلے مزاح میں واقع عمارت مکمل طور پر تباہ ہو گئی ہے۔ انہوں نے مزید کہا کہ اسرائیلی فضائیہ نے شام کی اسرائیل کے زیر قبضہ گولان کی پہاڑیوں پر پرواز کرتے ہوئے میزائل داغے۔ اسرائیلی فوج نے اس پر کوئی تبصرہ نہیں کیا۔ اس کے چند گھنٹے بعد، جنوبی لبنان کے بندرگاہی شہر طائر کے قریب ایک کار پر اسرائیلی ڈرون حملے میں دو افراد ہلاک ہو گئے، جن میں حزب اللہ کا ایک رکن بھی شامل تھا، جو گاڑی میں سوار تھے اور دو افراد جو قریبی باغ میں تھے۔ گروپ کے ایک اہلکار اور یہ بات لبنان کی سرکاری خبر رساں ایجنسی نے کہی۔ ہلاک ہونے والوں میں ایک مقامی حزب اللہ کمانڈر علی ہدروج بھی تھے۔
- ایران نے شام پر اسرائیلی میزائل حملے کی مذمت کی
وہیں ایران نے شام کے دارالحکومت دمشق پر اسرائیل کے میزائل حملے کی مذمت کی ہے جس میں مبینہ طور پر قدس فورس کے انٹیلی جنس چیف سمیت ایران کے اسلامی انقلابی گارڈ کور (آئی آرجی سی) کے پانچ مشیروں کی ہلاکت کی اطلاع ہے۔ ایرانی وزارت خارجہ نے ہفتے کے روز کہا کہ وزارت خارجہ کے ترجمان ناصر کنانی نے حملے کی مذمت کی ہے ۔ ایرانی میڈیا نے اطلاع دی ہے کہ دمشق پر اسرائیلی فضائی حملے میں قدس فورس کی انٹیلی جنس سروس کے کمانڈر سمیت آئی آرجی سی کے پانچ فوجی مشیر مارے گئے۔ شامی وزارت دفاع نے کہا کہ حملے میں متعدد شہری بھی ہلاک اور متعدد زخمی ہوئے ہیں۔
مزید پڑھیں: کیا مشرق وسطیٰ میں علاقائی جنگ کا امکان ہے؟
کنانی نے دمشق کے ضلع مازہ پر ہفتے کی صبح اسرائیل کے مہلک اور جارحانہ حملے کی شدید مذمت کی ہے۔ وزارت نے ایک بیان میں کہا ہے کہ شام کی خودمختاری اور علاقائی سالمیت کی بار بار خلاف ورزیاں اور مجرمانہ اور بچوں کو قتل کرنے والی اسرائیلی حکومت کی جانب سے مختلف اہداف پر جارحانہ اور اشتعال انگیز حملوں میں اضافہ غزہ اور مغربی کنارے میں مزاحمتی قوتوں کے خلاف میدان جنگ میں تل ابیب کی بے بسی کی عکاسی کرتا ہے۔ ترجمان نے کہا کہ ایران کے فوجی مشیر دمشق کی سرکاری دعوت پر شام میں تھے اور انہوں نے دہشت گردی کے خلاف جنگ میں شامی حکومت کی مدد کرنے اور ملک میں امن و استحکام کے قیام میں اہم کردار ادا کیا۔
یو این آئی مع مشمولات
یہ بھی پڑھیں: غزہ جنگ کی حکمت عملی پر اعلیٰ اسرائیلی حکام کے درمیان اختلافات ابھرنے لگے
امریکی کارروائیوں کے باوجود حوثیوں کی جانب سے بحری جہازوں پر حملے جاری: بائیڈن
