پشاور: ریاض سے آنے والے سعودی ایئرلائن کے طیارے میں جمعرات کو پشاور کے باچا خان انٹرنیشنل ایئرپورٹ پر لینڈنگ کے دوران آگ لگ گئی۔ مقامی میڈیا رپورٹس کے مطابق آگ لینڈنگ گیئر میں خرابی کے باعث لگی۔ تاہم، آگ لگنے کے باوجود کسی جانی نقصان کی اطلاع نہیں ہے۔ اس کے علاوہ طیارے سے تمام عملے اور مسافروں کو بحفاظت نکال لیا گیا۔ سول ایوی ایشن اتھارٹی اور فائر بریگیڈ کے اہلکاروں نے بالآخر آگ پر قابو پالیا ہے۔
Saudi Airline’s plane ✈️ got fire at Peshawar airport, safety protocols are activated. pic.twitter.com/iuxq6mmxjd
— فرحان الحق کیانی (@Farhan_Kiyani) July 11, 2024
سعودیہ ایئر لائن نے ایک بیان میں کہا کہ ریاض سے پشاور کے لیے پرواز کرنے والا طیارہ کے ایک ٹائر سے پاکستان میں پشاور انٹرنیشنل ایئرپورٹ پر لینڈنگ کے دوران دھواں نکلنے لگا۔ جس کی وجہ سے طیارے کو فوری طور پر روک دیا گیا ہے اور متعلقہ حکام کو اس کی اطلاع دے دی گئی۔ تمام مسافروں اور عملے کو انخلاء سلائیڈ کے ذریعے بحفاظت نکال لیا گیا ہے۔ ہوائی جہاز اب ماہرین کی طرف سے تکنیکی تشخیص سے گزر رہا ہے۔
طیارے میں 297 افراد سوار تھے۔ جن میں 276 مسافر اور 21 عملہ تھا۔ ایکس پر ایک پوسٹ میں گلوبل ڈیفنس انسائٹ نے طیارے کے پرزوں کی تصاویر اپ لوڈ کی ہیں، جن میں طیارے سے دھواں نکلتا ہوا نظر آرہا ہے۔ گلوبل ڈیفنس انسائٹ نے اپنی پوسٹ میں لکھا کہ ’ایئر ٹریفک کنٹرولر نے فوری طور پر پائلٹ اور فائر اینڈ ریسکیو سروسز کو واقعے کی اطلاع دی جنہوں نے بر وقت پہنچ کر آگ پر قابو پالیا اور ایک بڑا حادثہ ہونے سے بچا لیا‘۔
