غزہ: غزہ شہر کے ایک اہم چوراہے کویت اسکوائر کے قریب مدد کے منتظر کم از کم 20 فلسطینی جمعرات کو اسرائیلی حملے میں مارے گئے۔ غزہ کی وزارت صحت نے یہ اطلاع دی۔ وزارت کے ترجمان اشرف القدرہ نے بتایا کہ اسرائیلی حملے میں تقریباً 20 افراد ہلاک اور 150 زخمی ہوئے ہیں۔ ان کا کہنا تھا کہ حملے میں بڑی تعداد میں لوگ شدید زخمی ہوئے ہیں جس کی وجہ سے ہلاکتوں میں اضافے کا خدشہ ہے۔
قدرا نے کہا کہ زخمیوں کو شہر کے الشفا میڈیکل کمپلیکس بھیجا گیا لیکن اسپتال کی محدود طبی صلاحیتوں کی وجہ سے ان سب کا علاج ہوسکے اس کا امکان کم ہے۔
عینی شاہدین نے ژنہوا کو بتایا کہ اسرائیلی فورسز نے غزہ کے رہائشیوں کے ایک اجتماع پر گولیاں اور گولے برسائے جس کے نتیجے میں بڑی تعداد میں ہلاکتیں ہوئیں اور لوگ زخمی ہوئے۔
اسرائیلی فوج نے کہا کہ وہ ان رپورٹس کا جائزہ لے رہی ہے۔ ایسوسی ایٹڈ پریس آزادانہ طور پر اس واقعے کی تفصیلات کی تصدیق نہیں کر سکا۔
عینی شاہدین اور صحت کے حکام نے بتایا کہ فائرنگ غزہ شہر کے جنوبی کنارے پر ایک چوراہے میں ہوئی، جہاں ایک بڑا ہجوم مدد حاصل کرنے کے لیے جمع ہوا تھا۔ آن لائن پوسٹ کی گئی فوٹیج میں سینکڑوں لوگوں کو بھاگتے ہوئے دکھایا گیا ہے جن میں سے کچھ امداد کے ڈبے اٹھائے ہوئے دیکھے جا سکتے ہیں لیکن اچانک وہاں حملہ ہو گیا جس کے بعد آگ کے شعلے بھڑک اٹھے۔ وہاں موجود لوگوں نے زخمی فلسطینیوں کو گھوڑوں اور گدھا گاڑیوں پر لاد کر اسپتال پہنچایا۔
یہ بھی پڑھیں:اسرائیلی فوج کا خان یونس میں پناہ گاہ پر ٹینکوں سے حملہ، 9 افراد ہلاک
اسرائیل نے اس حملے میں اسرائیلی فوج کے براہ راست ملوث ہونے سے انکار کیا ہے۔ اسرائیلی ڈیفینس فورس کے مطابق اس واقعہ کی تحقیقات کی جارہی ہے۔
