تل ابیب: عرب میڈیا رپورٹس کے مطابق لبنان کے مختلف علاقوں میں حزب اللہ کے متعدد ارکان ان کے مواصلاتی آلات پیجرز پھٹنے سے زخمی ہوئے ہیں۔ تقریباً 70 افراد زخمی ہوئے ہیں، تاہم اس تعداد میں اضافہ کا قوی اندیشہ ہے۔ اسکائی نیوز نے عربی میں لبنانی ذرائع کے حوالے سے دعویٰ کیا ہے کہ دھماکے اسرائیلی ہیکنگ کا نتیجہ تھے۔ اسرائیلی حکام نے اس معاملے پر ابھی تک کوئی تبصرہ نہیں کیا ہے۔
عرب میڈیا رپورٹس کے مطابق اب تک حزب اللہ کے تقریباً 1000 کارکنان پیجرز اور ریڈیو پھٹنے سے زخمی ہو چکے ہیں۔ رپورٹس کے مطابق حزب اللہ بظاہر بیک وقت ہونے والے دھماکوں میں شام کی شخصیات بھی زخمی ہوئیں۔ لبنان میں ایران کے سفیر مجتبیٰ امانی بھی زخمی ہوئے۔
عرب میڈیا کے مطابق لبنان کے مخلتف علاقوں میں حزب اللہ ارکان کے پیجر میں ایک ساتھ دھماکے ہوئے۔ رابطوں کے لیے محفوظ سمجھی جانے والی 'پیجر ڈیوائسز' میں دھماکوں سے حزب اللہ کے کئی ارکان زخمی ہونے کی اطلاعات ہیں اور اسپتال زخمیوں سے بھر چکے ہیں، کئی زخمیوں کی حالت تشویش ناک ہے۔
سوشل میڈیا پر ان دھماکوں، ان کے نتیجے اور لبنانی ہسپتالوں میں افراتفری کی ویڈیوز وائرل ہورہی ہیں۔ غیر مصدقہ عرب میڈیا رپورٹس میں ان دھماکوں کو اسرائیلی سائبر حملہ قرار دیا گیا ہے۔ قابل ذکر بات یہ ہے کہ اسرائیل کی سیکورٹی کابینہ نے پیر کی رات اپنے سرکاری جنگی اہداف کو اپ ڈیٹ کیا ہے جس میں 60,000 شمالی باشندوں کی محفوظ واپسی کو ان کے گھروں میں شامل کیا گیا ہے۔ تقریباً 60,000 اسرائیلی لبنان کی سرحد کے قریب اپنے گھر خالی کرنے پر مجبور ہوئے جب حزب اللہ نے اکتوبر میں راکٹ اور ڈرون حملے شروع کیے تھے۔
حزب اللہ کے رہنماؤں نے کہا ہے کہ وہ اسرائیلیوں کو اپنے گھروں کو واپس جانے سے روکنے کے لیے حملے جاری رکھیں گے۔ ان حملوں میں اسرائیلی جانب سے 26 شہری اور 20 فوجی ہلاک ہوئے ہیں۔ اسرائیلی سیکیورٹی ایجنسی کے جاری کردہ اعداد و شمار کے مطابق حزب اللہ نے اگست میں شمالی اسرائیل پر 1,307 راکٹ اور اوسطاً روزانہ 40 راکٹ فائر کیے۔ 8 اکتوبر سے حزب اللہ نے 6,700 سے زیادہ راکٹ اور ڈرون لانچ کیے ہیں۔
سات اکتوبر 2023 سے غزہ میں جاری اسرائیلی جارحیت میں کم از کم 41,182 فلسطینی جاں بحق اور 95,280 زخمی ہو چکے ہیں۔ غزہ کا بیشتر حصہ کھنڈر میں تبدیل ہو چکا ہے۔ لیکن اسرائیل اپنے ہدف کو حاصل کرنے میں اب تک ناکام ہی رہا ہے۔ حماس آج بھی اسرائیل کی شرائط کے سامنے جھکنے کو تیار نہیں ہے۔ حماس کا مسلح ونگ اسرائیلی فوجیوں کو ہلاک کرنے کے ہر روز دعوے کرتا ہے جبکہ اسرائیل آج تک حماس کے جنگجوؤں کی ہلاکت کے ثبوت پیش نہیں کر پایا ہے۔
یہ بھی پڑھیں:
