نئی دہلی: آل انڈیا مسلم پرسنل لا بورڈ کے جنرل سکریٹری مولانا محمد فضل الرحیم مجددی نے اپنے بیان میں کہا کہ آپ تمام حضرات جانتے ہیں وقف امینڈمینٹ بل 2024 کے سلسلے میں جوائنٹ پارلیمانی کمیٹی (JPC)نے رائے مانگی تھی مجھے بے حد خوشی اور مسرت ہے کہ آپ تمام حضرات نے آل انڈیا مسلم پرسنل لا بورڈ کی آواز پر لبیک کہتے ہوئے اس کے کیو آر کوڈ اور لنک کے ذریعے بھرپور طریقے سے اپنی رائے بھیجنے کا سلسلہ جاری رکھا۔
انہوں نے کہا کہ ’آخری تاریخ 13 ستمبر تھی ، تاہم جوائنٹ پارلیمانی کمیٹی سے رابطہ کرنے پر معلوم ہوا کہ ابھی دو دن کا موقع مزید باقی ہے اور 15 ستمبر بروز اتوار کی رات بارہ بجے تک ای میل قبول کئے جائیں گے، اس لحاظ سے دو دن بڑھ گئے ہیں اور ہمیں جواب بھیجنے کا مزید موقع مل گیا ہے‘۔
یہ بھی پڑھیں: وقف ترمیمی بل 2024 مسلمان اور ملک دونوں کے لئے نقصاندہ: مختلف رہنماوں کا رد عمل - Waqf Amendment bill 2024
مولانا مجددی نے مزید کہا کہ ’لہٰذا آل انڈیا مسلم پرسنل لا بورڈ کی جانب سے یہ اعلان کیا جاتا ہے کہ ابھی ای میل بھیجنے کا سلسلہ جاری رکھیں اور جن حضرات نے اب تک ای میل نہیں کیا ہے ان سے ضرور ای میل کروائیں۔ اللہ سبحانہ و تعالیٰ آپ کو اس کا بہترین اجر عطا فرمائے۔ اور اس ملی جذبے اور خدمت کو قبول فرمائے‘۔
