نئی دہلی: لوک سبھا انتخابات 2024 کے لیے اب تک چھ مراحل کی ووٹنگ ہو چکی ہے، جب کہ ساتویں اور آخری مرحلے کے لیے ووٹنگ یکم جون کو ہوگی۔ خیال کیا جاتا ہے کہ اس بار کانگریس کی قیادت والے انڈیا بلاک اور بی جے پی کے درمیان سخت مقابلہ ہے۔
اس کے ساتھ سوشل میڈیا پر کانگریس لیڈر راہل گاندھی اور پی ایم مودی کی مقبولیت کو لے کر ایک الگ مقابلہ چل رہا ہے۔ لوگوں کو دونوں لیڈروں میں کتنی دلچسپی ہے اور ان کی مقبولیت کی سطح کیا ہے؟ اس بارے میں ہمیشہ تجسس رہتا ہے۔ ایسے میں دونوں لیڈروں کی مقبولیت کا اندازہ گوگل کے ٹرینڈ ڈیٹا سے لگایا جاتا ہے۔
آن لائن سرچ انجن گوگل کے ٹرینڈ ڈیٹا کے مطابق بھارت میں 28 مئی 2023 سے 3 جون 2023 کے درمیان گوگل سرچ میں نریندر مودی میں لوگوں کی دلچسپی کا اسکور (100 کے پیمانے پر) 90 تھا، جب کہ راہل گاندھی کے لیے یہ تعداد صرف 17 تھی۔
- ایک سال بعد صورت حال بدل گئی
تاہم، ایک سال بعد صورت حال بدل گئی اور 19 مئی 2024 سے 25 مئی 2024 کے درمیان راہل کا اسکور 17 سے بڑھ کر 33 ہو گیا، جب کہ پی ایم مودی کی مقبولیت کا گراف 16 پوائنٹس نیچے آیا اور 75 تک پہنچ گیا۔ حالانکہ گوگل پر نریندر مودی کو زیادہ سرچ کیے جانے کی ایک وجہ ان کا وزیر اعظم کے اعلیٰ آئینی عہدے پر فائز ہونا بھی ہے۔
- پی ایم مودی سوشل میڈیا پر سب سے زیادہ مقبول
نریندر مودی سوشل میڈیا پلیٹ فارمز جیسے انسٹاگرام، فیس بک اور یوٹیوب پر دنیا میں سب سے زیادہ فالو کیے جانے والے سیاستدان ہیں۔ چاروں پلیٹ فارمز پر نریندر مودی کے فالوورز کی تعداد 26 کروڑ سے زیادہ ہے۔ وہیں، اگر ہم راہل گاندھی کی بات کریں تو کانگریس لیڈر کے چاروں سوشل میڈیا پلیٹ فارمز پر کل 4.7 کروڑ فالوورز ہیں۔
