حیدرآباد: میڈیا کی سرکردہ شخصیت محترم رامو جی راﺅ کے انتقال سے نہ صرف میڈیا بلکہ اردو دنیا کا بھی ناقابل تلافی نقصان ہوا ہے۔ راموجی راﺅ نے مولانا آزاد نیشنل اردو یونیورسٹی کی ہمیشہ سے سرپرستی کی ہے اور ای ٹی وی اردو کے ذریعہ دنیا بھر کے کروڑوں شائقین کو ایک دلچسپ پلیٹ فارم فراہم کیا تھا۔ ان خیالات کا اظہار وائس چانسلر پروفیسر سید عین الحسن نے محترم راموجی راﺅ کے انتقال پر افسوس اور تعزیت کا اظہار کرتے ہوئے کیا۔ محترم راموجی راﺅ کے انتقال پر جاری کردہ اپنے ایک تعزیتی بیان میں پروفیسر عین الحسن نے کہا کہ اردو صحافت کی تاریخ میں راموجی راﺅ کی خدمات ہمیشہ یاد رکھی جائیں گی اور ان کا نام سنہری لفظوں میں لکھا جائے گا۔
یہ بھی پڑھیں:
راموجی راؤ کا راموجی گروپ آف کمپنیز کے ملازمین کے نام پیغام - Media Boran Ramoji Rao
راموجی راؤ: ایک ایسی شخصیت جنہوں نے لاتعداد لوگوں کو بے مثال بلندیوں تک پہنچایا - Ramoji Rao A Legend
ہندوستان کے پہلے اردو سٹیلائٹ ٹیلی ویژن چینل کے آغاز کا سہرا ان ہی کے سر جاتا ہے۔ جنہوں نے منفعت کی پرواہ کیے بغیر اردو سے اپنی محبت کا اظہار کیا اور ای ٹی وی اردو کا آغاز کیا۔ بعد ازاں انہوں نے بھارت کا سب سے بڑا ڈیجیٹل نیٹ ورک ای ٹی وی بھارت کے نام سے لانچ کیا۔ لیجینڈ راموجی راﺅ نے مولانا آزاد نیشنل اردو یونیورسٹی کے بے شمار طلبہ کو اپنا کیریئر شروع کرنے اور صحافت میں عملی تربیت فراہم کرنے میں پہلے ای ٹی وی اردو اور پھر ای ٹی وی بھارت کے بینر تلے پرکشش مواقع فراہم کیے۔ دکھ کی اس گھڑی میں اردو یونیورسٹی، راموجی راﺅ کے اہل خانہ اور کروڑوں چاہنے والوں کے ساتھ ہے۔
