حیدرآباد : بھارتیہ جنتا پارٹی (بی جے پی) کے سینئر لیڈر اور سابق نائب وزیر اعظم لال کرشن اڈوانی کو منگل کے روز دہلی کے اپولو ہسپتال میں داخل کرایا گیا۔ ذرائع کے مطابق 96 سالہ اڈوانی کی حالت مستحکم ہے اور وہ ڈاکٹر ونیت سوری کی دیکھ بھال میں زیرعلاج ہیں۔ اڈوانی نے سابق وزیر اعظم اٹل بہاری واجپائی کے ساتھ مل کر بی جے پی کو مرکزی دھارے کی سیاست میں لانے میں اہم کردار ادا کیا تھا۔ اڈوانی نے ایودھیا میں رام مندر تحریک کی بھی قیادت کی تھی۔
اپولو ہسپتال کی جانب سے جاری ایک بیان میں کہا گیا کہ ’بھارت کے سابق نائب وزیر اعظم ایل کے اڈوانی جی، ڈاکٹر ونیت سوری کی نگرانی میں اندرا پرستھ اپولو ہسپتال میں داخل ہیں۔ انہیں ان کے باقاعدہ فالو اپ ٹیسٹ اور تحقیقات کے لیے داخل کیا گیا ہے‘۔ بیان میں مزید کہا گیا کہ اڈوانی کو جلد ہی ہسپتال سے ڈسچارج کئے جانے کا امکان ہے۔
یہ بھی پڑھیں: صدر مرمو نے ایل کے اڈوانی کو ان کی رہائش گاہ پر بھارت رتن سے نواز - Bharat Ratna Award
واضح رہےکہ گذشتہ جولائی کے پہلے ہفتے میں بھی، اڈوانی کو اپولو ہسپتال میں داخل کیا گیا اور کچھ دن ڈاکٹروں کی نگرانی میں رکھ کر انہیں ڈسچارج کیا گیا تھا۔ انہیں نیورولوجی ڈپارٹمنٹ کے سینئر کنسلٹنٹ ڈاکٹر ونیت سوری کی دیکھ بھال میں ہسپتال میں شریک کیا گیا تھا۔ اس سے پہلے، سابق بی جے پی سربراہ کو نئی دہلی کے آل انڈیا انسٹی ٹیوٹ آف میڈیکل سائنسز (ایمس) میں بھی داخل کیا گیا تھا اور رات بھر رکھنے کے بعد انہیں ہسپتال سے چھٹی دے دی گئی تھی۔
