نئی دہلی: NEET-UG امتحان-2024 امتحان پر جاری تنازعہ پر کانگریس، مودی حکومت کو گھیرنے کا کوئی موقع ہاتھ سے جانے دینا نہیں چاہتی۔ آج کانگریس کے سابق صدر اور رکن پارلیمنٹ راہل گاندھی اور کانگریس کی جنرل سکریٹری پرینکا گاندھی نیٹ امتحانا 2024 میں دھاندلی اور بے ضابطگی کے خلاف احتجاج کررہے نیٹ امیدواروں سے ملاقات کرنے جا رہے ہیں۔ اس کے علاوہ کانگریس نے مودی حکومت کے خلاف اس تنازعہ پر ٹویٹ وار چھیڑ دیا ہے۔ کانگریس صدر ملیکارجن کھرگے نے ایکس پر ایک پوسٹ کیا ہے جس میں پی ایم مودی کو پورے تنازعہ پر گھیرنے کی کوشش کی ہے۔ کانگریس پارٹی نے پی ایم مودی پر زور دیا کہ وہ اس پورے معاملے کی ذمہ داری لیں، کانگریس نے وزیراعظم نریندر مودی سے پیپر لیک کو روکنے میں ناکامی کی ذمہ داری لینے کو کہا ہے۔
کھرگے کا کہنا ہے کہ، یہ مودی حکومت کی انا کی شکست ہے۔ آپ امتحان کے بارے میں بہت بات کرتے ہیں، آپ NEET امتحان کے بارے میں کب بات کریں گے؟ UGC-NET امتحان کی منسوخی لاکھوں طلباء کے حوصلے کی جیت ہے۔ مرکزی وزیر تعلیم نے پہلے کہا تھا کہ NEET میں کوئی پرچہ لیک نہیں ہوا تھا۔ جب بہار، گجرات اور ہریانہ میں ایجوکیشن مافیا پکڑے جاتے ہیں تو وزیر تعلیم تسلیم کرتے ہیں کہ کوئی نہ کوئی گھپلہ ہوا ہے! انہوں نے پوچھا ، نیٹ کا امتحان کب منسوخ ہوگا؟'
کانگریس کی جنرل سکریٹری پرینکا گاندھی نے بھی مودی حکومت کے خلاف محاذ کھول دیا ہے۔ پرینکا نے ایکس پر ایک پوسٹ شیئر کرتے ہوئے پورے معاملے پر احتساب طے کرنے پر زور دیا ہے۔ کانگریس کی جنرل سکریٹری نے لکھا کہ، مودی جی، براہ کرم اپنی حکومت کی نیٹ امتحان میں دھاندلی اور پیپر لیک کو روکنے میں ناکامی کی ذمہ داری لیں! پرینکا گاندھی نے کہا کہ کم از کم اب احتساب تو طے ہونا چاہیے۔ پرینکا نے مزید کہا کہ، 'بی جے پی حکومت کی سُستی اور بدعنوانی نوجوانوں کے لیے مہلک ہے۔ نیٹ امتحان میں دھاندلی کی خبر کے بعد اب 18 جون کو ہونے والا نیٹ امتحان بھی بے ضابطگیوں کے خوف سے منسوخ کر دیا گیا ہے۔
