కాంగ్రెస్​ ఐదో జాబితా విడుదల

లోక్​సభ ఎన్నికలు దగ్గరపడుతున్న వేళ... అభ్యర్థుల జాబితాలు ఇప్పుడిప్పుడే కొలిక్కివస్తున్నాయి. తాజాగా కాంగ్రెస్​ పార్టీ 56 మంది అభ్యర్థులతో కూడిన ఐదో జాబితా విడుదల చేసింది. ఇందులో ఆంధ్రప్రదేశ్​ నుంచి 22, పశ్చిమ్​ బంగ నుంచి 11 మంది ఉన్నారు. ఇంతకుముందు నాలుగు విడతల్లో 137 మంది పేర్లను ప్రకటించింది అధిష్టానం.

2019 సార్వత్రికంలో సత్తా చాటి అధికారంలోకి రావాలని చూస్తున్న హస్తం పార్టీ ఆచితూచి అడుగులు వేస్తోంది. అభ్యర్థుల ఎంపికలోనూ అదే వ్యూహం అమలు చేస్తోంది. తాజాగా లోక్​సభ బరిలో నిలవనున్న మరో 56 మంది పేర్లను ప్రకటించింది అధిష్టానం.

అత్యధికంగా ఆంధ్రప్రదేశ్​ నుంచి 22, అత్యల్పంగా యూపీ నుంచి ముగ్గురి పేర్లు వెల్లడించింది. బంగాల్​ నుంచి 11, తెలంగాణ నుంచి 8, ఒడిశాలో 6, అసోం నుంచి ఐదుగురిని ఎన్నికల పోటీకి దింపింది.

ప్రణబ్​ తనయుడికి అవకాశం...

భారత మాజీ రాష్ట్రపతి ప్రణబ్​ ముఖర్జీ కుమారుడు అభిజిత్​ ముఖర్జీని లోక్​సభ బరిలో నిలిపింది కాంగ్రెస్​. బంగాల్​లోని జంగీపుర్​ స్థానం నుంచి వీరు పోటీ చేయనున్నారు.

రాహుల్​ గాంధీ నేతృత్వంలో సమావేశమైన కాంగ్రెస్​ కేంద్ర ఎన్నికల కమిటీ ఈ జాబితా వెలువరించింది. ఒడిశాలో కేంద్ర మాజీ మంత్రి భక్తచరణ్​ దాస్​ను కలహండి నుంచి బరిలో నిలిపింది. ఒడిశా నుంచి శాసనసభ ఎన్నికల్లో పోటీచేయనున్న మరో 36 మంది పేర్లనూ ప్రకటించింది.