దేశంలో కరోనా తీవ్ర రూపం దాల్చుతోంది. ఈ మహమ్మారి దెబ్బకు బలైనవారి సంఖ్య నెమ్మదిగా పెరుగుతోంది. మంగళవారం ఉదయానికి మరో మూడు మరణాలు నమోదయ్యాయి. మధ్యప్రదేశ్, మహారాష్ట్రలో కేసులు గణనీయంగా పెరిగాయి.
బంగాల్, కేరళ, మధ్యప్రదేశ్లో ఒక్కొక్కరు మృతి చెందారు. అయితే చనిపోయిన ఈ ముగ్గురూ గతం నుంచే ఆరోగ్య సమస్యలతో బాధపడుతున్నట్లు వైద్యులు ధ్రువీకరించారు.
కేరళలో మరణాలు @ 2
కేరళలో 68 ఏళ్ల ఓ వ్యక్తి కరోనా వైరస్ కారణంగా మృతిచెందాడు. తిరువనంతపురంలోని ఓ వైద్య కళాశాల ఆస్పత్రిలో ఇతడికి దాదాపు 5 రోజులు వెంటిలేటర్ మీద చికిత్స అందించినట్లు వైద్యులు వెల్లడించారు. చనిపోయిన వ్యక్తికి కరోనాతో పాటు అధిక రక్తపోటు, కిడ్నీ సంబంధిత సమస్యలూ ఉన్నట్లు తెలిపారు.
కేరళలో కరోనా మరణాల సంఖ్య రెండుకు చేరింది.
మధ్యప్రదేశ్లో మరణాలు @ 5
మధ్యప్రదేశ్లో 49 ఏళ్ల ఓ మహిళ కరోనా బారిన పడి చనిపోయింది. ఈ రాష్ట్రంలో మొత్తం మృతుల సంఖ్య ఐదుకు చేరింది.
చందన్ నగర్కు చెందిన మహిళ.. మనోరమా రాజే టీబీ ఆసుపత్రిలో చికిత్స పొందుతూ మరణించినట్లు ఆ రాష్ట్ర వైద్య విభాగం ప్రకటించింది. ఈ మహిళ ఎటువంటి ప్రయాణాలు చేయలేదని నిర్ధరించారు. అయితే అధిక రక్తపోటు, డయాబెటిస్తో కొన్నేళ్లుగా బాధపడుతున్నట్లు తెలిసింది.
మధ్యప్రదేశ్లో ఇప్పటివరకు మొత్తం 47 మందికి కరోనా పాజిటివ్గా తేలగా.. ఇందులో 27 మంది ఇండోర్కు చెందినవాళ్లే ఉన్నారు. జబల్పుర్లో 8, ఉజ్జయిన్లో 5, బోపాల్లో 3, శివపురి, గ్వాలియర్లో ఒక్కో కేసు నమోదైంది.
బంగాల్లో మరణాలు @ 3
బంగాల్లో మరొకరు మృతి చెందారు. ఫలితంగా ఆ రాష్ట్రంలో మరణాల సంఖ్య మూడుకు చేరింది.
హావ్డా జిల్లాలోని ఓ ఆసుపత్రిలో చికిత్స పొందుతూ ఓ వ్యక్తి మరణించాడు. వైద్య పరీక్షల ఫలితాలు రాకముందే ఇతడు మరణించినట్లు వైద్యులు ధ్రువీకరించారు. దక్షిణ బంగాల్లో ఇతడు పర్యటించినట్లు తెలుస్తోంది.
బంగాల్లో నాలుగు కొత్త పాజిటివ్ కేసులు నమోదయ్యాయి. రాష్ట్రంలో బాధితుల సంఖ్య 26కు చేరింది.
ఛత్తీస్గఢ్లో పాజిటివ్ @ 8
కరోనా మహమ్మారి దెబ్బకు ఛత్తీస్గఢ్లో బాధితుల సంఖ్య మొత్తం ఎనిమిదికి చేరింది. తాజాగా 22 ఏళ్ల ఓ యువకుడు లండన్ నుంచి ముంబయి మీదుగా స్వగామమైన కోర్బా పట్టణానికి వచ్చాడు. మార్చి 18న స్వదేశానికి వచ్చిన ఇతడు దగ్గు, జలుబు లక్షణాలతో బాధపడటం వల్ల ఇతడిని రాయ్పూర్లోని ఎయిమ్స్లో చేర్చారు. ఇతడి రక్త నమూనాలను పరిశీలించగా.. కొవిడ్-19 పాజిటివ్గా తేలింది. ఇతడితో కలిసి ప్రయాణించిన తన చెల్లికి మాత్రం టెస్టు ఫలితాల్లో నెగిటివ్ వచ్చినట్లుగా అధికారులు తెలిపారు. ప్రస్తుతం ఆ వ్యక్తి కుటుంబం మొత్తాన్ని హోమ్ క్వారంటైన్లో ఉండాలని ఆదేశించినట్లు కోర్బా కలెక్టర్ కిరణ్ కౌశల్ తెలిపారు. ప్రస్తుతం బాధితుడు క్షేమంగానే ఉన్నట్లు వైద్యులు ధ్రువీకరించారు.
మహారాష్ట్రలో పాజిటివ్ @ 225
మహారాష్ట్రలో కొత్తగా 5 కేసులు పాజిటివ్గా నమోదయ్యాయి. ఫలితంగా మొత్తం బాధితుల సంఖ్య 225కు చేరింది. సోమవారం సాయంత్రం నాటికి ఒక్క ముంబయిలోనే 42 కొత్త కేసులు చేరినట్లు ఆ రాష్ట్ర వైద్య విభాగం వెల్లడించింది. వారికి వైద్య పరీక్షలు చేసి ఫలితాల కోసం ఎదురుచూస్తున్నట్లు తెలిపింది.
రాజస్థాన్లో పాజిటివ్ @ 83
రాజస్థాన్లో మరో ఏడుగురికి కరోనా సోకినట్లు నిర్ధరణ అయింది. వీరంతా ఇరాన్ నుంచి ఇటీవల స్వదేశానికి వచ్చిన వారే. కేంద్రప్రభుత్వం ప్రత్యేక విమానంలో వీరందరినీ రాజస్థాన్ జోధ్పుర్ తీసుకువచ్చి, నిర్బంధ కేంద్రంలో ఉంచింది.
రాజస్థాన్లో కరోనా కేసుల సంఖ్య 83కు చేరింది.
బిహార్లో పాజిటివ్ @ 16
బిహార్ పట్నాలో మరొకరికి కరోనా సోకినట్లు నిర్ధరణ అయింది. ఆ రాష్ట్రంలో మొత్తం పాజిటివ్ కేసుల సంఖ్య 16కు చేరింది
ఇప్పటివరకు కేంద్ర వైద్య ఆరోగ్యశాఖ లెక్కల ప్రకారం మొత్తం 1,251 కేసులు నమోదయ్యాయి. ఇందులో 32 మంది చనిపోగా.. 102 మంది కోలుకున్నారు.
