Problems in Indiranagar: వైఎస్ఆర్ కడప జిల్లాలో వైఎస్ ఏర్పాటు చేసిన కాలనీలోనే నివాసితులు సమస్యల కొలిమిలో కొట్టుమిట్టాడుతున్నారు. 2006లో నాటి ముఖ్యమంత్రి వైఎస్ రాజశేఖరరెడ్డి స్వహస్తాలతో శంకుస్థాపన చేసిన ఇందిరానగర్లో నేటికీ తిష్ట వేసిన సమస్యలతో ప్రజలు నరకయాతన అనుభవిస్తున్నారు. నాడు వైఎస్.. నేడు ఆయన కుమారుడు జగన్ మోహన్ రెడ్డి ఇద్దరూ ముఖ్యమంత్రి పదవి చేపట్టినా సొంత జిల్లా అయినప్పటికీ ఇందిరా నగర్లోని ప్రజల ఇక్కట్లు తీరడం లేదు. అధికారంలోకి ఎవరొచ్చినా తమ కష్టాలు, కడగండ్లను తీర్చే నాథుడే కనిపించడం లేదని ఇందిరా నగర్ కాలనీవాసులు కన్నీళ్లు పెట్టుకుంటున్నారు.
పన్నులు చెల్లిస్తున్నా మౌలిక సౌకర్యాలు కల్పించరా?..: ఎన్ని ప్రభుత్వాలు మారినా ఇందిరానగర్ కాలనీవాసుల సమస్యలు మాత్రం పరిష్కారానికి నోచుకోవడం లేదు. అన్ని రకాల పన్నులు చెల్లిస్తున్నప్పటికీ ఆయా కాలనీల్లో మౌలిక సమస్యలు పరిష్కారానికి నోచుకోవడం లేదు. ఏళ్ల తరబడి ఎక్కడి సమస్యలు అక్కడే తిష్ట వేశాయి. ఎంతోమంది అధికారులు నాయకులు వస్తూ పోతున్నారు గానీ సమస్యలు పరిష్కరించే నాథుడే కనిపించలేదు. ఇటీవల 'గడపగడపకు మన ప్రభుత్వం' కార్యక్రమం నిర్వహించినప్పటికీ సమస్యల పరిష్కారంలో అధికారపక్ష నేతలు శ్రద్ధ చూపడం లేదు. సమస్యల పరిష్కారం కోసం ఆ కాలనీవాసులు వెయ్యికళ్లతో ఎదురుచూస్తున్నారు.
సిమెంటు రోడ్లే లేవు..: కడప నగరానికి 10 కిలోమీటర్ల దూరంలో ఉన్న ఇందిరానగర్ ఉంది. 2006లో అప్పటి ముఖ్యమంత్రి వైయస్ రాజశేఖర్ రెడ్డి ఈ కాలనీని ఏర్పాటు చేశారు. ఈ కాలనీలో సుమారు 6000 నివాసాలు ఉన్నాయి. చిన్న పెద్ద అందరూ కలుపుకొని 20 వేల మంది జీవిస్తున్నారు. అందరూ పేద మధ్యతరగతి ప్రజానీకమే. దినసరి కూలీలే ఎక్కువమంది ఉన్నారు. ఈ కాలనీలోని మూడవ సెక్టార్లో ఇప్పటివరకు సిమెంటు రోడ్లు లేకపోవడం దారుణం. మట్టి రోడ్లు పైగా ఎగుడుదిగుడు రోడ్లతోనే ఈ కాలనీవాసులు నెట్టుకొస్తున్నారు. ఈ కాలనీలోకి ఆటోలు రావాలంటే కూడా భయపడుతున్నారు. వర్షాకాలం వచ్చిందంటే మట్టిరోడ్లపై భారీగా నీరు చేరి నడవాలంటే కూడా గగనంగా ఉంటుంది.
గుంతల్లో మురుగునీరు..: పైగా మురికి కాలువలు లేకపోవడంతో నివాసాల వద్దనే గుంతలు తీసుకొని నీటిని నిల్వ ఉంచుతున్నారు. గుంత నిండితే ఆ నీటిని రోడ్లపైకి వదులుతున్నారు దీంతో స్థానికంగా గొడవలు జరుగుతున్నాయి. నివాసాల చుట్టూ మురుగు కాలువలు ప్రవహించడంతో దోమలతో స్థానికులు అవస్థలు పడుతున్నారు. రోడ్లపై మురుగునీరు నిల్వ ఉండడంతో సమస్యలు ఎదుర్కొంటున్నారు. మురికి కాలువలు లేకపోవడంతోనే మురుగు సమస్య వేధిస్తోంది.
రోడ్లపైనే మురుగునీరు..: ఇందిరానగర్ ఏర్పడి దాదాపు 17 సంవత్సరాలు అయినప్పటికీ సమస్యలు ఎక్కడ వేసిన గొంగళి అక్కడే అన్నట్లు తయారయ్యాయి. ముఖ్యంగా మూడో సెక్టార్లో రోడ్లు మురుగు కాలువలు లేకపోవడంతో చాలా ఇబ్బందికరంగా ఉంది. మురుగునీరు రోడ్లపై నుంచి ప్రవహిస్తున్నాయి.
పందులకు ఆవాసం: నగరంలో ఎక్కడా లేని పందులు ఇందిరానగర్లోనే సంచరిస్తున్నాయి. చిన్నపిల్లలు పందులతో భయపడుతున్నారు. నివాసాల్లోకి వస్తున్నాయని స్థానికులు ఆందోళన చెందుతున్నారు. కొన్ని కొన్ని వీధుల్లో పలువురు నివాసితులు రోడ్లను సైతం ఆక్రమించి సిమెంట్ కట్టడాలు నిర్మించుకున్నారు. ఎవరి ఇంటి ఎదుట వారు ఎత్తుగా బండలు వేసుకోవడంతో వాహనాలు వెళ్లాలంటే ఇబ్బందులు పడుతున్నారు.
సచివాలయం ఏదీ?..: దాదాపు 20 వేల మంది ఉన్న ఈ కాలనీలో ఒక్క సచివాలయం కూడా లేదు. సచివాలయానికి వెళ్లాలంటే ఎనిమిది కిలోమీటర్ల దూరం వెళ్లాలి. అంగన్వాడీ కేంద్రం కూడా లేదు. కనీసం పిల్లలు ఆడుకునేందుకు పార్కులు కూడా అధికారులు ఏర్పాటు చేయలేదంటూ ఇందిరానగర్ వాసి సాయి ఆవేదన వ్యక్తం చేస్తున్నారు.
మౌలిక వసతులు కల్పించాలి..: అధికారులు స్పందించి రోడ్లు మురికి కాలువలు ఏర్పాటు చేయాలని స్థానికుడు మణికంఠ రెడ్డి కోరుతున్నారు. ఏళ్ల తరబడి నుంచి సమస్యలకు నోచుకోని ఇందిరానగర్లో మౌలిక వసతులను పరిష్కరించాలని స్థానికురాలు లక్ష్మీదేవి కోరుతున్నారు.
ఇవీ చదవండి
