పశ్చిమ గోదావరి జిల్లా జీలుగుమిల్లి మండలం అంకంపాలెంలో ఇంటిలోకి అర్ధరాత్రి చొరబడి, మహిళపై దాడి చేసిన యువకులను శిక్షించాలని స్థానిక యాదవ సంఘం సభ్యులు నిరసన చేపట్టారు. ముగ్గురు యువకులు రాత్రి ఒంటి గంటకు ఇంటిపై దాడి చేశారని సంఘం మండల అధ్యక్షుడు నాలి శ్రీను అన్నారు. మహిళతో పాటు చిన్నారులపై కూడా దాడికి పాల్పడ్డారని ఆయన తెలిపారు. విచక్షణారహితంగా కొట్టిన వారిని నిర్బంధించి పోలీసులకు అప్పగిస్తే, దళితులపై దాడి చేశారనే నెపంతో తమపై అట్రాసిటీ కేసు నమోదు చేశారని ఆరోపించారు. ఘటనపై పూర్తిస్థాయి దర్యాప్తు చేపట్టి అధికారులు తమకు న్యాయం చేయాలని కోరారు. లేనిపక్షంలో తీవ్రస్థాయి ఆందోళన చేపడతామని హెచ్చరించారు.
ఇదీ చదవండి: ఇరు వర్గాల మధ్య ఘర్షణ... పి.అంకంపాలెంలో ఉద్రిక్తత
