సామాజిక మాధ్యమాల్లో పెట్టే పోస్టులతో ప్రధానంగా సమస్యాత్మక, అతి సమస్యాత్మక గ్రామాల్లో పరిస్థితులు చిన్నచిన్న కారణాలతో పగ, ప్రతీకారాలు చెలరేగేలా చేస్తుంటాయి. అందుకే పోలీసులు ఆయా గ్రామాలపై ప్రత్యేక దృష్టి పెట్టారు. ఆ గ్రామాలపై ఎప్పటికప్పుడు డేగకన్ను వేసి ఉంచుతున్నారు.
పశ్చిమ గోదావరి జిల్లాలో సమస్యాత్మక గ్రామాలు 360 ఉండగా, అత్యంత సమస్యాత్మక గ్రామాలు 246 ఉన్నట్లు పోలీసు గణాంకాలు తెలియజేస్తున్నాయి. ఈ నేపథ్యంలో ఆయా గ్రామాల పరిధిలోని బైండోవర్‌ వ్యక్తులు, రౌడీషీటర్లు, సామాజిక మాధ్యమాల ద్వారా వివాదాస్పద పోస్టింగ్‌లు పెట్టే వారిపై నిఘా ఉంచారు. ఈ నేపథ్యంలో ఎన్నికల నిబంధనలు ఏం చెబుతున్నాయంటే..
- సామాజిక మాధ్యమాల్లో వచ్చే ప్రతి రాజకీయ సందేశానికి అడ్మిన్‌దే పూర్తి బాధ్యత. ఎవరైనా సభ్యులు అభ్యంతరకర పోస్టులు పెడితే వారిని వెంటనే ఆ గ్రూపు నుంచి తొలగించడం శ్రేయస్కరం.
- వ్యక్తిగత దూషణలు చేయకూడదు.
- ఓటర్లను ప్రలోభపెట్టేలా పోస్టులు పెట్టకూడదు.
- అడ్మిన్‌తో పాటు గ్రూపు సభ్యులు ఎవరైనా సరే వివాదాస్పద పోస్టులు పెడితే కేసు నమోదు చేసే అవకాశం ఉంటుంది.
- సామాజిక వర్గాలు, మతాలను రెచ్చగొట్టేలా పోస్టులు పెట్టడంపై ఇప్పటికే పోలీసు శాఖ నిషేధం విధించింది.
- మార్ఫింగ్‌ చేసిన ఫొటోలు, వీడియోలను షేర్‌ చేసినా ఇబ్బందులు ఎదుర్కోవాల్సి ఉంటుంది.
- సామాజిక వర్గాల మధ్య వివాదాలు రేపే ఏ అంశంపై అయినా సరే సామాజిక మాధ్యమాల్లో పోస్టులు పెడితే చట్టపరమైన చర్యలు తీసుకుంటారు.
- తెలియని అంశాలను షేర్‌ చేయకూడదు.
ఇదీ చదవండి: పంచాయతీ పోరు: మూడో దశ ఎన్నికల ప్రక్రియ ప్రారంభం
