గుట్టుచప్పుడు కాకుండా ఆయిల్ ట్యాంకర్లో అక్రమంగా తరలిస్తున్న గంజాయిని పోలీసులు పట్టుకున్నారు. విశ్వసనీయ సమాచారం మేరకు పశ్చిమగోదావరి జిల్లా జీలుగుమిల్లిలోని ఆంధ్ర-తెలంగాణ సరిహద్దు తనిఖీ కేంద్రం వద్ద పోలీసులు తనిఖీలు నిర్వహించారు. ఓ ప్రైవేటు సంస్థకు చెందిన ఆయిల్ ట్యాంకర్ లారీలో గంజాయి ఉన్నట్లు గుర్తించారు. లారీతో పాటు ఇద్దరిని అరెస్టు చేసి విచారిస్తున్నారు.
ట్యాంకర్లోని 5 అరల్లో ఎటువంటి అనుమానం కలగకుండా నిందితులు భారీ మొత్తంలో గంజాయి తరలిస్తున్నారు. తూర్పు గోదావరి జిల్లా రావులపాలెం నుంచి తెలంగాణలోని హైదరాబాద్కు తరలిస్తున్నట్లు ప్రాథమిక విచారణలో తేలింది. రావులపాలెంలో కొందరు నిందితులు లారీలో గంజాయి నింపి తీసుకెళ్లమన్నారని లారీ డ్రైవర్ తెలిపినట్లు పోలీసులు వెల్లడించారు. లారీలో ఉన్న గంజాయిని వెలికితీసే పనిలో పోలీసులు నిమగ్నమయ్యారని ఎస్సై చంద్రశేఖర్ తెలిపారు.
ఇదీ చదవండి:
