వివాహేతర సంబంధాలు చివరకు హత్యలకు దారి తీస్తున్నాయి. తాజాగా ఇలాంటి ఘటన పశ్చిమగోదావరి జిల్లా ఉంగుటూరు మండలం వెంకటరామన్న గూడెం అటవీ ప్రాంతంలో చోటు చేసుకుంది. రామలక్ష్మీ అనే మహిళను ఓ వ్యక్తి దారుణంగా హతమార్చాడు. వెంకట రామన్నగూడెంకు చెందిన మడకం రామలక్ష్మి భర్త రవిని విడిచిపెట్టింది. కుమార్తె, ఇద్దరు కుమారులతో కలిసి తెలికిచర్ల వెళ్లే రహదారి పక్కన నివాసముంటుంది. మూడేళ్ల క్రితం స్థానికంగా ఉంటున్న యర్రా సూర్యారావుతో పరిచయం ఏర్పడింది. ఆ పరిచయం వివాహేతర సంబంధానికి దారితీసింది.
మంగళవారం ఇంటి నుంచి బయటకు వెళ్ళిన రామలక్ష్మి.. ఎంతసేపటికి ఇంటికి రాకపోవడంతో ఆమె కుమారులు చేబ్రోలు పోలీసులకు ఫిర్యాదు చేశారు. మంగళవారం నుంచి రామలక్ష్మి కోసం గాలింపు చేపట్టగా బుధవారం రామలక్ష్మి ఇంటికి సుమారు 500 మీటర్ల దూరంలోని అటవీ ప్రాంతంలో శవమై కనిపించింది. రామలక్ష్మి వేరే వ్యక్తితో సంబంధం కలిగి ఉందన్న అనుమానంతో సూర్యారావు పథకం ప్రకారం ఆమెను అడవికి తీసుకెళ్లి హతమార్చినట్లు పోలీసులు అనుమానిస్తున్నారు.
అనంతరం నిందితుడు సూర్యారావు గుడిలోని పొలాల వద్దకు వెళ్లి పురుగుల మందు తాగి ఆత్మహత్యాయత్నానికి పాల్పడ్డాడు. ఇతనిని తన బంధువులు తాడేపల్లిగూడెంలోని ప్రైవేటు ఆసుపత్రికి తరలించారు. అక్కడ చికిత్స పొందుతున్న సూర్యారావు పరిస్థితి విషమంగానే ఉందని వైద్యులు తెలిపారు. ఘటన స్థలాన్ని పోలీసులు పరిశీలించారు. మృతురాలు రామలక్ష్మిది బోయ సామాజిక వర్గం. ఏలూరు డీఎస్పీ పర్యవేక్షణలో శవ పరీక్షలు చేసేందుకు ఏర్పాట్లు చేస్తున్నారు.
ఇదీ చదవండి: ఎస్సీ యువకుడిని బూటు కాలితో తన్నిన కాశీబుగ్గ సీఐ
