విజయనగరంజిల్లా పార్వతీపురం డివిజన్లో సాగు ప్రాజెక్టులు ఉండటం వల్ల వరిసాగు ఆశాజనకంగా ఉన్నా.. విజయనగరం డివిజన్లో పొలాలన్నీ వర్షాధారం. చాలా మండలాలో నారును రక్షించుకోవడం కష్టం అవుతోంది. జులై మొదటి వారంలో కాస్త వర్షం కురిసినా.. తరువాత చినుకు జాడ కరవైంది. జూన్, జూలై నెలలో కలిపి 16 మిల్లీమీటర్ల లోటు వర్షపాతం నమోదైందని లెక్కుల చెబుతున్నాయి. గజపతినగరం మండలం మినహా మిగిలిన 33 మండలాల్లో లోటు వర్షపాతం నమోదైంది.
ఖరీప్ సీజన్లో అన్ని పంటలూ కలిపి 1.73 లక్షల హెక్టార్లలో సాగు కావాల్సి ఉండగా.. ఇప్పటి వరకూ 56,775 హెక్టార్లలో మాత్రమే సాగు అయ్యింది. 1.18 లక్షల హెక్టార్లలో వరి నాట్లు వేయాల్సి ఉండగా.. కేవలం 52వేల హెక్టార్లలోనే సాగైందంటే పరిస్థితి తీవ్రత అర్థం చేసుకోవచ్చు. అడపాదడపా వర్షాలకు సాగు చేసిన పంటలను కాపాడుకునేందుకు ఇంజన్ మోటర్లతో.. కిలోమీటర్ల కొద్ది పైపులు వేసి పంటలను తడుపుతున్నారు. డిజల్ ధరలు పెరిగిన నేపథ్యంలో నీటి తడులకు పంట పెట్టుబడుల కంటే.. అధికంగా ఖర్చు చేయాల్సి వస్తోందని రైతులు వాపోతున్నారు.
జిల్లాలో ఖరీఫ్ లో సాగైన ఆరుతడి పంటల పరిస్థితి ఇంతే. చిరుజల్లులు, అడపాదడపా కురిసిన వర్షాలకు అక్కడక్కడ వేరుశనగ, మొక్కజొన్న తదితర పంటలను సాగు చేశారు. ఈ పరిస్థితుల్లో వర్షం వచ్చినా.. పంటలు కోలుకునే అవకాశం లేదని రైతులు వాపోతున్నారు. వ్యవసాయ శాఖ లెక్కల ప్రకారం ఆగస్టు 15వ తేదీ వరకూ జిల్లాలో ఖరీఫ్ వరిసాగుకు అవకాశం ఉంది. ఆ తర్వాత పరిస్థితిని పరిశీలించి ప్రత్యామ్నాయ ఏర్పాట్లు చేస్తామంటున్నారు. ఈ లోగా వరుణుడు కరుణ చూపిస్తాడా..? లేదా అనేది చూడాల్సి ఉంది.
ఇదీ చదవండి:
