TTD CHAIRMAN YV SUBBAREDDY AT VELUGONDA : పూల సుబ్బయ్య వెలిగొండ ప్రాజెక్టు నిర్మాణ పనులు అక్టోబర్ నాటికి పూర్తిచేస్తామని టీటీడీ ఛైర్మన్ వైవీ సుబ్బారెడ్డి తెలిపారు. ప్రకాశం జిల్లా దోర్నాల మండలం కొత్తూరు సమీపంలో జరుగుతున్న సొరంగ నిర్మాణ పనులను రాష్ట్ర పురపాలక, పట్టణాభివృద్ధిశాఖ మంత్రి సురేష్‌, మార్కాపురం ఎమ్మెల్యే నాగార్జున రెడ్డిలతో కలిసి ఆయన పరిశీలించారు.
సొరంగం తవ్వకం పనులు పూర్తయ్యాయని నీటిని విడుదల చేసేందుకు సిద్ధంగా ఉందని ఇంజినీరింగ్‌ అధికారులు వారికి వివరించారు. రెండో సొరంగంలోకి కొంత దూరం వాహనంలో వెళ్లి వచ్చారు. నిర్మాణ పనుల పురోగతిపై సీఈ మురళీనాథరెడ్డితో చర్చించారు. అనంతరం ఆయన విలేకరులతో మాట్లాడుతూ.. గత ప్రభుత్వం వెలిగొండ తొలి సొరంగం నిర్మాణాన్ని కూడా పూర్తి చేయలేకపోయిందన్నారు.
"దురదృష్టవశాత్తు కరోనా మహమ్మారి వల్ల ప్రాజెక్ట్ పనులు రెండు సంవత్సరాలు ఆగాయి... ఆ తరువాత పరిస్థితులు మెరుగుపడటంతో పనులు మొదలుపెట్టాం. మొదటి టన్నెల్ పూర్తి అయ్యింది.. ఈ నిముషంలో అయిన నీరు ఇచ్చేందుకు సిద్ధంగా ఉన్నాం. అయితే రెండో టన్నెల్లో 2.6 కిలో మీటర్ల మేర పనులు పెండింగ్ ఉంది.. అది పూర్తి కాగానే రెండు టన్నెల్స్ ద్వారా నీరందిస్తాం. మొదటి టన్నెల్ పూర్తి అయినా నీరు ఇవ్వడానికి అభ్యంతరం ఏమి లేదు. ఒక వేళ నీరు వదిలితే రెగ్యులేటర్ కట్టే వీలు ఉండదు"-వైవీ సుబ్బారెడ్డి, తిరుమల తిరుపతి దేవస్థానం ఛైర్మన్
ముఖ్యమంత్రి జగన్‌ నిధులు కేటాయించి పనుల పురోగతికి దోహదపడ్డారన్నారు. తొలి సొరంగం తవ్వకం పనులు పూర్తయ్యి నల్లమల సాగర్‌ రిజర్వాయర్‌కు నీరందించేందుకు సిద్ధంగా ఉంది. రెండో సొరంగంలో 2.6 కి.మీల తవ్వకం జరగాల్సి ఉందన్నారు. ఆ పనులను నాలుగు, అయిదు నెలల్లో పూర్తి చేస్తామని ఇంజినీరింగ్‌ అధికారులు తెలిపారన్నారు.
రిజర్వాయర్‌లో రెగ్యులేటర్ల నిర్మాణ పనులు సెప్టెంబర్‌, అక్టోబర్ నెలల్లో పూర్తయ్యే అవకాశం ఉందన్నారు. ఎస్‌ఈ అబూతలిమ్‌, భూసేకరణ ప్రత్యేక కలెక్టర్‌ సరళావందనం, ఏఎంసీ ఛైర్మన్ శ్రీనివాసరెడ్డి, మాజీ జడ్పీటీసీ సభ్యుడు అమిరెడ్డి రామిరెడ్డి, గుత్తేదారు సంస్థ ప్రతినిధులు, ఇంజినీర్లు తదితరులు పాల్గొన్నారు.
ఇవీ చదవండి:
