కేటుగాళ్ల నడ్డి వంచీ.. నేరాలను నియంత్రించే పోలీసుల పేరు చెప్పే.. మోసాలకు పాల్పడుతున్నారు నయా నేరగాళ్లు. పోలీసులను బురిడీ కొట్టించేందుకు ఏకంగా ఎస్పీ పేరునే వాడుకుంటున్నారు. ఎస్పీ సిద్ధార్ధ్ కౌశల్ పేరుతో నకిలీ ఫేస్బుక్ అకౌంట్ను ప్రారంభించి, దాంతో ఫ్రెండ్ రిక్వెస్ట్లు పంపించి డబ్బులు వసూళ్లకు పాల్పడుతున్నారు. ప్రకాశం జిల్లాలో ఇప్పటికే పలువురి ఎస్ఐ, సీఐల పేరుమీద నకిలీ ఖాతాలు ప్రారంభించినట్లు తెలుస్తోంది.
నకిలీ ఫేస్బుక్ ఖాతా ద్వారా ఓ పత్రికేయుడికి ఎస్పీ సిద్ధార్ద్ కౌశల్ పేరుతో స్నేహ అభ్యర్ధన వచ్చింది. ఎస్పీ కదా అని పాత్రికేయుడు ఆమోదం తెలిపాడు. కొద్దీ సేపటికే మెస్సెంజర్లో చాటింగ్ ప్రారంభించాడు. ఎస్పీ కదా అని సదరు పాత్రికేయుడు కూడా మర్యాదగా చాటింగ్ చేశాడు. అంతలోనే అభ్యర్ధన. 'మీతో ఓ అవసరం పడింది. కొంత మొత్తం నగదు కావాలి.. ఫోన్ పే చేస్తే రేపే తిరిగిచ్చేస్తా.. అంటూ సందేశం పంపాడు. 15 వేల రూపాయలు కావాలని అభ్యర్ధించడం.. పాత్రికేయుడు అవాక్కయ్యాడు. సంబంధిత పోలీసులకు సమాచారం అందించడం.. ఎస్పీ అప్రమత్తమయ్యారు. తన పేరుపై ఉన్నది నకిలీ ఖాతా అని, అప్రమత్తంగా ఉండాలని ప్రకటించారు.
అప్పటికే పలువురికి ఎస్పీ పేరుతో నకిలీ అకౌంట్ నుంచి అభ్యర్ధనలు వెళ్లినట్లు పోలీసులు గుర్తించారు. అక్కడితో ఆగని సైబర్ కేటుగాళ్లు జిల్లాలో పలువురి సీఐ, ఎస్ఐల పేరుతో కూడా నకిలీ ఫేస్బుక్ అకౌంట్లు తెరిచి డబ్బులు అడుగుతున్నట్లు తెలుసుకున్నారు. దీంతో ఆయా పోలీస్ అధికారులు.. నకిలీ ఖాతాల విషయమై తమ తమ అధికారిక ఖాతాల్లో ప్రకటనలు ఇచ్చుకుంటున్నారు. గతంలో ఒకరిద్దరు సీఐ, ఎస్ఐల పేరు మీద నకిలీ అకౌంట్లు సృష్టించి డబ్బులు వసూళ్లకు ప్రయత్నించినా.. అధికారులు పెద్దగా పట్టించుకోలేదు. ఇప్పుడు ఏకంగా ఎస్పీ పేరు మీదే ఫేస్బుక్లో నకిలీ అకౌంట్ తెరవడం, డబ్బులు వసూలుకు ప్రయత్నించడం సీరియస్గా తీసుకున్న పోలీసులు, నేరస్థుడిని గుర్తించేందుకు సమాయత్తమయ్యారు.
ఇవీ చూడండి...
