కర్నూలు జిల్లా కుప్పగల్లు గ్రామంలో జిల్లా కలెక్టర్ వీరపాండ్యన్, ఎస్పీ ఫకీరప్ప పర్యటించారు. ఆదోని మండలం కుప్పగల్లు గ్రామంలో కుల వివక్షపై సభ ఏర్పాటు చేశారు. గ్రామంలో కులాలు పట్టించుకోకుండా ప్రజలంతా కలిసి మెలిసి ఉండాలని కలెక్టర్ సూచించారు. సోదరభావంతో మెలగాలని అవగాహన కల్పించారు. గత కొన్ని ఏళ్లుగా నాయి బ్రాహ్మణులు, గ్రామంలోని ఎస్సీలకు క్షవరం చేయడం లేదని.. ఫలితంగా క్షవరం కోసం షెడ్యూల్డ్ కులాలు ఆదోని వెళ్తున్నారు.
వివక్ష చూపరాదు..
సమాచారం అందుకున్న జిల్లా పాలనాధికారి రంగంలోకి దిగారు. ఈ మేరకు హేర్ సెలూన్ దుకాణ నిర్వాహకులకు అవగాహన కల్పించారు. ఎవరొచ్చినా కటింగ్ చేయాలే తప్ప కుల వివక్ష చూపరాదని తెలిపారు. ఎవరైనా రాజ్యాంగ ఉల్లంఘనలకు పాల్పడితే కఠినమైన చర్యలు తీసుకుంటామని హెచ్చరించారు.
అదేం పద్ధతి..
టీ షాప్లో ఓ వర్గం వారికి ఒక గ్లాసు, మరో వర్గానికి వేరే గ్లాసులు ఇవ్వడం పట్ల కలెక్టర్ ఫైరయ్యారు. ఆధునిక కాలంలో ఇలాంటి అమానవీయ సంఘటనలు చోటుచేసుకోవడం పట్ల ఆగ్రహం వ్యక్తం చేశారు. ఇలాంటి వాటిని ప్రోత్సహించిన వారిపై తీవ్రమైన చర్యలు తీసుకోవాలని ఎస్పీ ఫకీరప్పను ఆదేశించారు.
