కృష్ణా జిల్లా చల్లపల్లి మండలం వక్కలగడ్డకు చెందిన బుర్రే రాఘవమ్మ పురిటిగడ్డ, చల్లపల్లి గ్రామ పంచాయతీల్లో స్వీపర్, వాచ్ఉమన్ గా పనిచేసి.. పదకొండు సంవత్సరాల క్రితం ఉద్యోగ విరమణ పొందారు. అప్పటికే తనకు పురిటిగడ్డ గ్రామ పంచాయతీలో రూ.53,050 జీతం రావల్సి ఉండగా అది పెండింగ్ లోనే ఉంచారు. అలాగే పెన్షన్ కంట్రిబ్యూషన్ రూ.78,171 తో పాటు ప్రావిడెంట్ ఫండ్ కోసం తిరిగీ తిరిగీ ఆమె అలిసిపోయారు.
స్పందన, ప్రజావాణి కార్యక్రమాల్లో అనేక సార్లు తన గోడు వినిపించారు. అంతేగాక.. జిల్లా అధికారుల వద్ధ అనేక సార్లు మొర పెట్టుకున్నారు. వృద్ధాప్యం మీద పడుతున్నా కార్యాలయాల చుట్టూ తిరిగి విసిగి వేసారిపోయారు. చివరికి.. లోక్ అదాలత్ కు వెళ్లినా.. అక్కడి నుంచి వచ్చిన ఆదేశాలను గ్రామ పంచాయతీ అధికారులు పట్టించుకోలేదు. మరో సందర్భంలో... జిల్లా పంచాయతీ అధికారులు ఆదేశాలు జారీ చేసినా మోక్షం లభించలేదు.
ప్రస్తుతం తీవ్ర అనారోగ్యంతో మంచం పట్టిన బుర్రే రాఘవమ్మ కనీసం మాట్లాడలేని స్థితిలో ఉంది. పురిటిగడ్డలో తన పెద్ద కుమార్తె చావలి నళిని సంరక్షణలో ఉన్న ఆమె దీన స్థితిని.. మేనల్లుడు శీలం భాస్కరరావు మీడియాకు తెలిపారు. రాఘవమ్మ చనిపోయేలోపైనా అధికారులు ఆమెకు రావాల్సిన జీతం, పెన్షన్ కంట్రిబ్యూషన్ ఇప్పించాలని విజ్ఞప్తి చేశారు.
ఇదీ చదవండి:
ఆంగ్లం మోజులో తెలుగును నిర్లక్ష్యం చేయడం తగదు: సీజేఐ జస్టిస్‌ ఎన్‌.వి.రమణ
