పోలీసులు, ప్రైవేట్ సెక్యూరిటీ సంస్థలకు చెందిన వ్యక్తుల పేర్లతో ఫేస్బుక్లో నకిలీ ఖాతాలు తెరచి..అత్యవసరంగా నగదు కావాలంటూ రిక్వెస్ట్లు పంపి నగదు దోచుకుంటున్నారు. తాజాగా ఇటువంటి సంఘటన విజయవాడలో వెలుగుచూసింది . అజిత్సింగ్ నగర్ పీఎస్ పరిధిలో ఉంటున్న... బాలగురుప్రసాద్ రెడ్డి సిటీ గార్డ్స్ అనే ప్రైవేట్ సెక్యూరిటీ ఏజెన్సీలో హెడ్ కానిస్టేబుల్గా పని చేస్తున్నారు. అదే సెక్యూరిటీ సంస్థలో ఎస్సై స్థాయిలో పని చేస్తున్న జయన్న అనే వ్యక్తి పేరుపై ఫేస్బుక్లో... తనకు అత్యవసరంగా లక్ష రూపాయలు నగదు కావాలని ఓ మెస్సేజ్ వచ్చింది. దీనితో గురుప్రసాద్ లక్ష రూపాయల నగదును పంపేందుకు సిద్ధమై..ఫోన్ చేసేందుకు ప్రయత్నించాడు. ఫోన్ కలవకపోవటంతో తెలిసిన వ్యక్తే కదా అని లక్ష రూపాయలను రెండు దఫాలుగా ఆన్లైన్ ద్వారా పంపించారు. అనంతరం జయన్నకు ఫోన్ చేసి నగదు అందాయా లేదా అని ఫోన్ చేయగా.. తనకు నగదు గురించి తెలియదని సదరు వ్యక్తి సమాధానం చెప్పాడు. దీంతో మోసపోయానని బాధితుడు అజిత్సింగ్ నగర్ పోలీసులకు ఫిర్యాదు చేశాడు. పోలీసులు కేసు నమోదు చేసుకొని.. డిజిటల్ ఆధారాల కోసం కేసును సైబర్ క్రైమ్ పోలీసులకు పంపించారు.
ఇదీ చదవండి: 'అధికారం శాశ్వతం కాదు.. గుర్తు పెట్టుకోండి'
