కలంకారి.. ఓ పురాతన కళ. వెదురుతో చేసిన కలంతో సహజ సిద్ధమైన రంగుల్ని ఉపయోగించి వస్త్రాలపై బొమ్మలు చిత్రించే కళ. చిత్తూరు జిల్లా శ్రీకాళహస్తిలో పుట్టిన కలంకారి... కృష్ణా జిల్లా మచిలీపట్నం, పెడనలో ప్రసిద్ధి గాంచింది. పెడన ఈ పరిశ్రమకు పుట్టినిల్లు. 80 శాతం కుటుంబాలు ఈ పరిశ్రమపైనే ఆధారపడ్డాయి. చేతితో అచ్చు వేస్తూ అందమైన వస్త్రాలు తయారు చేయడం ఇక్కడి కార్మికుల ప్రత్యేకత. దేశ విదేశాల్లోనూ ఈ వస్త్రాలకు ప్రత్యేక గుర్తింపు ఉంది.
కలంకారి విద్యలో ముఖ్యంగా చెప్పుకోవాల్సింది... సహజ సిద్ధంగా తయారు చేసే రంగులు. ఎలాంటి రసాయనాలు వాడకుండా కూరగాయలు, ఇతర పదార్ధాలతో విభిన్న రంగులు తయారు చేసి వస్త్రానికి అద్దుతారు. శ్రీకాళహస్తిలో సుమారు 2 వేల కుటుంబాలు, పెడనలో 3వేల కుటుంబాలు దీనిపై ఆధారపడి పనిచేసేవి. ప్రస్తుతం చాలా మంది కళాకారులు వ్యవసాయం, ఇతర పనుల వైపు మళ్లుతున్న కారణంగా... ఈ కళ అదృశ్యమయ్యే జాబితాలో చేరింది.
ముడి పదార్థాల ధరలు రోజు రోజుకీ పెరగడం... అందుకు అనుగుణంగా ఆదాయం రాకపోవడం వంటి కారణాలతో పరిశ్రమ గడ్డు పరిస్ధితిని ఎదుర్కొంటోంది. వస్త్రాలకు మార్కెట్లో గిరాకీ, సరైన మార్కెటింగ్ సౌకర్యం లేకపోవడం వల్ల ఉత్పత్తిదారులకు నష్టాలు వస్తున్నాయి. కార్మికులకూ ఆశించిన వేతనాలు ఇవ్వలేని పరిస్ధితి నెలకొంది. ఫలితంగా .. ఒక్కొక్కరుగా కలంకారి వస్త్రాల తయారీకి దూరమవుతున్నారు.
అంతర్జాతీయ స్థాయిలో ప్రఖ్యాతిగాంచిన కలంకారి హస్తకళల పరిశ్రమ... గత పాలకుల నిర్లక్ష్యం కారణంగా సంక్షోభం దిశగా పయనిస్తోంది. ఓ దశలో వెలుగు వెలిగిన ఈ కళ... ప్రస్తుతం కళతప్పి.. వెలవెలబోతోంది. ఈ పరిశ్రమకు ప్రోత్సాహకాలు ఇచ్చి.. లాభాల బాటలోకి తీసుకురావడానికి ప్రభుత్వం చొరవ చూపాలని కార్మికులు కోరుతున్నారు.
