మంచినీళ్లు రావు.. మురుగు పోదు.. గొల్లపూడివాసుల అవస్థలు

Gollapudi troubles: విజయవాడకు కూతవేటు దూరంలో ఉన్న గ్రామం.. ఏపీ రాజధానిలో కీలకం.. ప్రభుత్వ కార్యాలయాలకు కేంద్రం.. సమీపంలోనే రహదారి వలయం.. అయినా ఆ గ్రామ ప్రజలకు తిప్పలు తప్పడం లేదు. కనుచూపు మేరలో కృష్ణమ్మ ఉన్నా నీరు తాగే భాగ్యం లేదా అని ఆవేదన చెందుతున్నారు. మంచినీరు, పారిశుద్ధ్య సౌకర్యాలు లేక విలవిల్లాడుతున్నారు. ప్రభుత్వం ప్రత్యేక దృష్టి సారించి తమ సమస్యలు పరిష్కరించాలని గొల్లపూడి ప్రజలు కోరుతున్నారు.

No Facilities in Gollapudi: విజయవాడకు కూతవేటు దూరంలో ఉన్నప్పటికీ తాగునీటి, పారిశుద్ధ్య సమస్యలతో గొల్లపూడి నివాసితులు కంటతడి పెడుతున్నారు. గొల్లపూడి మేజర్ గ్రామ పంచాయతీ రోజూ ఎదుర్కొంటున్న సమస్యలకేదీ పూచీ అంటూ ప్రభుత్వాన్ని ప్రజలు నిలదీస్తున్నారు. ఏపీ రాజధానిలో కీలకం, విజయవాడ ప్రాశస్త్యానికి నిలయం, సమీపంలో బహిర్గత రహదారి వలయం, ప్రభుత్వ కార్యాలయాలకు కేంద్రంగా ఉన్న గొల్లపూడిలో కనీస పౌర సదుపాయాలపై ప్రభుత్వం దృష్టి పెట్టకపోవడంపై ప్రజలు ఆగ్రహం వ్యక్తం చేస్తున్నారు. రెండు దశాబ్దాల క్రితం ఏర్పడ్డ గొల్లపూడిలో ఇప్పటికీ ప్రజలకి తాగునీరు, మురుగు కాల్వల సౌకర్యంలేక అవస్థలు పడుతుండటాన్ని జీర్ణించుకోలేకపోతున్నారు. కనుచూపుమేరలో ఉండే కృష్ణమ్మ నీరు తాగే భాగ్యంలేదా అని గొల్లపూడి ప్రజలు ఆవేదన చెందుతున్నారు. తాగునీరు, మురుగుకాల్వల సౌకర్యాలు లేక పడుతున్న కష్టాలపై రాష్ట్ర పురపాలక శాఖ ప్రత్యేక దృష్టి పెట్టి తక్షణం పరిష్కారాలు చూపాలని గొల్లపూడి ప్రజలు విన్నవిస్తున్నారు.

నీటిని కొనుక్కోవాల్సిన దుస్థితి..: భూగర్భ జలాలు కాలుష్యం కావడంతో వ్యక్తిగత బోర్లు వేసుకున్నా ఫలితం లేదని చెబుతున్నారు. వంటలకు సహా డబ్బులు పెట్టి నీటిని కొనుకోవాల్సిన పరిస్థితి గొల్లపూడి వాసులకు ఏర్పడిందంటున్నారు. మరోవైపు మురుగు కాల్వల సౌకర్యం అరకొరగా ఉండడంతో పారిశుద్ధ్య సమస్యతో రోగాల బారిన పడుతున్నామని ప్రజలు ఆవేదన వ్యక్తం చేస్తున్నారు. ఈ ప్రాంతంలో ఇళ్లు నిర్మించుకుని దశాబ్దాలు గడుస్తున్నా మౌలిక వసతులు కల్పించకపోవడంతో ప్రజలు తీవ్ర ఇబ్బందులు పడుతున్నారు.

కృష్ణా నది పక్కనున్నా గొంతెండుతోంది..: ఏళ్లు గడుస్తున్నా గొల్లపూడి ప్రజలను పట్టిపీడిస్తున్న నీటి కష్టాలు తీరడం లేదు. కృష్ణా నదికి మూడు కిలోమీటర్ల దూరంలో నివాసముంటున్న గొల్లపూడి వాసులకి తాగునీరు అందకపోవడంతో అవస్థలు వర్ణనాతీతంగా మారాయి. భూగర్భ జలాలు పూర్తిగా కలుషితమయ్యాయని వ్యక్తిగత బోర్ల నీరు తాగే పరిస్థితిలేదని ప్రజలు ఆవేదన చెందుతున్నారు. ప్రభుత్వ అధికారులకు, ప్రజాప్రతినిధులకు పలుమార్లు విన్నవించినా ఫలితం ఉండటం లేదని అసహనం వ్యక్తం చేస్తున్నారు.

కేంద్ర నిధులను సద్వినియోగం చేయని రాష్ట్రం..: కేంద్ర ప్రభుత్వం ఇంటింటికీ కుళాయి సౌకర్యం కల్పించాలని నిధులు కేటాయిస్తున్నా... రాష్ట్ర ప్రభుత్వం ఆ నిధులు సద్వినియోగం చేసుకోకపోవడం దారుణమంటున్నారు. తామంతా సుమారు ఇరవై ఏళ్ల క్రితమే ఇక్కడ ఇళ్ల నిర్మాణం చేసుకున్నామని ఏళ్లు గడుస్తున్న తాగనీటి సౌకర్యం కల్పించకపోవడమేమిటని పలు కాలనీల వాసులు ప్రశ్నిస్తున్నారు. నగరానికి, కాలుష్యానికి దూరంగా జీవించాలన్న ఉద్దేశంతో ఇక్కడ స్థలాలు కొనుక్కొని ఇళ్లు నిర్మించుకున్నామంటున్నారు. గొల్లపూడిలో పారిశుద్ధ్యం సరిగా లేకపోవడంతో పలు అనారోగ్యం సమస్యలు ఎదుర్కొంటున్నామని చెబుతున్నారు. తాగునీటి కోసం నెలకి వందలాది రూపాయలు ఖర్చు చేస్తున్నామని ఆవేదన చెందుతున్నారు.

నిరుపయోగంగా నీటిశుద్ధి యంత్రాలు..: వేల రూపాయలు ఖర్చు చేసి నీటిని శుద్ధి చేసే యంత్రాలు కొన్నా ఉపయోగం లేదంటున్నారు. వ్యక్తిగత బోర్ల నుంచి కలుషిత నీరు రావడంతో నీటిని శుద్ధిచేసే విద్యుత్ యంత్రాలు పాడవుతున్నాయని వాపోతున్నారు. వర్షాకాలం వస్తే దోమల బెడద.. వేసవి కాలం నీటి సమస్యతో తీవ్రంగా ఇబ్బందులు పడుతున్నామని గొల్లపూడి కాలనీల వాసులు చెబుతున్నారు. కొన్ని ఇళ్లకు పంచాయితీ నీరు వస్తున్నా... అర్థరాత్రి మంచినీరు రావడంతో ఇబ్బందులు పడుతున్నామంటున్నారు.

కుళాయిల్లో దుర్వాసనతో నీరు..: కుళాయిల్లో నీరు రావడమేమోగానీ నీళ్ల నుంచీ వచ్చే దుర్వాసనతో భరించలేక పోతున్నామని కాలనీ వాసులు చెబుతున్నారు. జనాభా పెరుగుతున్న తరుణంలో ఊరు పెరుగుతున్నప్పటికీ నివాసితుల అవసరాలు తీర్చలేని పరిస్థితుల్లో ప్రభుత్వం ఉందని విమర్శిస్తున్నారు. గొల్లపూడి మేజర్ గ్రామ పంచాయితీలో సుమారు 80వేల మంది ప్రజలు నివసిస్తున్నారు. వేసవి సమీపిస్తున్న తరుణంలో తమకు మంచినీటి సౌకర్యం కల్పించాలని, దోమల బెడద నుంచి రక్షణ కోసం మురుగు కాల్వల నిర్మాణం పూర్తి స్థాయిలో చేపట్టాలని గొల్లపూడి వాసులు ప్రభుత్వాన్ని కోరుతున్నారు.

ఇవీ చదవండి