పరిపాలన వికేంద్రీకరణ, సీఆర్డీఏ చట్టం రద్దు బిల్లులు 2014 ఏపీ పునః వ్యవస్థీకరణ చట్టానికి వ్యతిరేకమంటూ తెలుగుదేశం అధినేత చంద్రబాబు గవర్నర్ బిశ్వభూషన్ హరిచందన్కు లేఖ రాశారు. ఆంధ్రప్రదేశ్‌ను కాపాడాలంటూ ఆరు పేజీల లేఖ ద్వారా విజ్ఞప్తి చేశారు. రాజకీయ కక్షల ముసుగులోనే వైకాపా ప్రభుత్వం ఈ బిల్లులను తీసుకువచ్చిందని మండిపడ్డారు. రాజధానుల వ్యవహారం హైకోర్టులో పెండింగ్‌లో ఉన్నప్పుడు, శాసనసభ నిబంధనల ప్రకారం ఈ బిల్లులను చర్చించడం/ ఆమోదించడం కోర్టు ఉల్లంఘన కిందకు వస్తుందని చంద్రబాబు లేఖలో పేర్కొన్నారు.
పునః వ్యవస్థీకరణ చట్టం -2014 ఆధారంగా ఆంధ్రప్రదేశ్ రాజధానిగా అమరావతిని నెలకొల్పాం. కేంద్ర ప్రభుత్వం ఏర్పాటు చేసిన కమిటీ సిఫారసుల ప్రకారం విజయవాడ- గుంటూరు మధ్య ప్రాంతాన్ని కొత్త రాజధాని నగరంగా ఎంపిక చేశాం. జాతీయ, అంతర్జాతీయ ప్రమాణాలకు ధీటైన నగరంగా పకడ్బందీగా అమరావతిని డిజైన్ చేశాం. వైకాపా ప్రభుత్వం అధికారం చేపట్టినప్పటి నుంచి అమరావతి ప్రతిష్ఠను దెబ్బతీసేందుకే తీవ్ర ప్రయత్నాలు చేస్తోంది. శాసన మండలి ఈ బిల్లులను సెలెక్ట్ కమిటీకి సూచించింది. సెలెక్ట్ కమిటీ వద్ద పెండింగ్‌లో ఉన్నందున శాసన మండలి రెండోసారి బిల్లులను పరిగణించలేదు. ఈ బిల్లులపై నిర్ణయం తీసుకునే సందర్భంగా వాస్తవాలను పరిగణనలోకి తీసుకోవాలి. ప్రజా ప్రయోజనాలను దృష్టిలో ఉంచుకుని సరైన చర్యలు తీసుకోవాలి- చంద్రబాబు, తెదేపా అధినేత
ఇదీ చదవండి
