'గిన్నీస్' రికార్డుల 'సూక్ష్మ కళా' మాంత్రికుడు

వ్యక్తిగత ప్రతిభ విభాగంలో గిన్నీస్‌బుక్‌ రికార్డు సాధించడం అనేది ఎంతో కష్టతరం. అలాంటిది ఏకంగా మూడుసార్లు వరుసగా గిన్నిస్‌ రికార్డు సాధించాడు  ఓ స్వర్ణకారుడు. సూక్ష్మవస్తువుల తయారీలో అరుదైన  ఘనత సాధించి అందరి దృష్టిని ఆకర్షిస్తున్నాడు.

తూర్పుగోదావరి జిల్లా పెద్దాపురం పట్టణానికి చెందిన తాళాబత్తుల సాయి స్వర్ణకారుడు. వీరి కుటుంబం అనాదిగా బంగారు వస్తువుల తయారీ చేస్తూ నగల దుకాణాన్ని నడుపుతోంది. పెద్దాపురానికి ప్రపంచవ్యాప్తంగా పేరు తెచ్చేందుకు ఏదైనా చేయాలనే సంకల్పంతో సూక్ష్మ వస్తువుల తయారీని ప్రారంభించాడు.

వరసగా మూడు సార్లు గిన్నీస్...

2016లో 8 * 4 మిల్లీమీటర్ల సూక్ష్మ ఎలుకల బోను గిన్నీస్‌బుక్‌ ఆఫ్‌ వరల్డ్‌ రికార్డులోకి ఎక్కింది. 2017లో నాటికల్‌ నాట్‌ బోల్ట్‌ను 5 * 7 సెంటీమీటర్లు కొలతలతో తీర్చిదిద్ది మరోసారి గిన్నీస్ ఘనత సాధించాడు. 2018లో సూక్ష్మ వ్యాక్యూమ్‌ క్లీనర్‌ను 5.3 సెంటీమీటర్ల పొడవుతో తయారుచేసి ముచ్చటగా ముడోసారి గిన్నీస్ రికార్డుకెక్కాడు.

బొట్టు బిళ్లలతో కళా ఖండాలు....

సాయి చేతి నుంచి రూపుదిద్దుకున్న కళాఖండాలు కోకొల్లలుగా ఉన్నాయి. వాటిలో 20వేల బొట్టు బిళ్లలతో ఎన్టీయార్‌ చిత్రపటం, 8వేల బొట్టు బిళ్లలతో వినాయకుడి ఆకృతి, 6 వేల బొట్టుబిళ్లలతో గౌతమబుద్దుడి చిత్రపటాలను ఎంతో ఆకర్షణీయంగా రూపొందించాడు.