అనంతపురం జిల్లాలో...
శెట్టూరు మండలం బసంపల్లి సమీపంలో అక్రమంగా తరలిస్తున్న 1,060 కర్ణాటక మద్యం ప్యాకెట్లను పోలీసులు స్వాధీనం చేసుకున్నారు. కర్ణాటక రాష్ట్రంలోని చిత్రదుర్గం జిల్లా నుంచి అడ్డదారుల్లో తీసుకొస్తున్నారన్న సమాచారంతో పోలీసులు తనిఖీలు చేసి పట్టుకున్నారు. మద్యంతో పాటు ఆటో, ద్విచక్రవాహనాన్ని స్వాధీనం చేసుకున్నారు. ముగ్గురిని అరెస్టు చేశారు.
గుత్తి మండలం గొందిపల్లిలోని కొండగుట్టలో స్థానిక పోలీసులు నిర్వహించిన దాడుల్లో 2,500 లీటర్ల బెల్లం ఊట ధ్వంసం చేసి, నాలుగు లీటర్ల నాటుసారా స్వాధీనం చేసుకున్నారు. పోలీసులు వస్తున్నారన్న ముందస్తు సమాచారంతో సారా తయారీ దారులు పరారయ్యారు. ఈ ఘటనపై పోలీసులు కేసు నమోదు చేసుకుని దర్యాప్తు చేస్తున్నారు.
కృష్ణా జిల్లాలో...
తెలంగాణ నుంచి రాష్ట్రానికి అక్రమంగా తరలిస్తున్న మద్యాన్ని కృష్ణా జిల్లా మైలవరం పోలీసులు స్వాధీనం చేసుకున్నారు. దాదాపు రూ.84 వేల విలువైన మద్యం బాటిళ్లను పట్టుకున్నట్లు నూజివీడు డీఎస్పీ శ్రీనివాసులు తెలిపారు. ముగ్గురు నిందితులను అదుపులోకి తీసుకున్నామని తెలిపారు. వారి నుంచి రూ.పది వేల నగదు, కారు స్వాధీనం చేసుకున్నారు. తనిఖీలలో కీలక పాత్ర పోషించిన సిబ్బందిని ఆయన ప్రశంసించారు.
ఇదీ చదవండి: ఎస్పీ బాలు హెల్త్ బులెటిన్ విడుదల
