అన్ని మతాలను గౌరవించడం మన దేశ సంస్కృతి. మతంతో సంబంధం లేకుండా అందరినీ కలుపుకొని పోవడం భారతీయులమైన మన డీఎన్ఏలోనే ఉంది. ఇందుకు ఉదాహరణ కర్నూల్, అనంతపురంలో జరిగిన ఈ వేడుక.
పీర్ల పండుగ సందర్భంగా కర్నూల్ జిల్లా కౌతాళం మండలం ఉరుకుంద ఈరన్న స్వామి ఆలయానికి పెద్ద పీర్లు వచ్చాయి. పూజారి వాటికి హారతి ఇచ్చారు. ఆ తర్వాత ఊరేగింపు నిర్వహించి పీర్లను నిమజ్జనం చేశారు.
ఉరుకుంద గ్రామంలో వెలసిన ఈరన్న స్వామి హిందువుల దేవుడు. ఇక్కడ శ్రావణ మాసం సందర్భంగా నెల రోజుల పాటు ఉత్సవాలు ఘనంగా జరుగుతాయి. అయితే ఇదే సమయంలో ముస్లింల పెద్ద పీర్ల పండుగ సందర్భంగా పీర్లను కొలువు తీర్చారు. చివరి రోజు కావడంతో నిమజ్జనం చేయడం సంప్రదాయం. ఈ సందర్భంగా పీర్లను ఉరుకుంద ఈరన్న స్వామి ఆలయానికి తీసుకెళ్లి దర్శనం చేయించారు. పూజారి హారతి ఇచ్చారు.
చాలా ఏళ్లుగా ఇలా చేయడం ఇక్కడ ఆనవాయితీగా వస్తోంది. ఎలాంటి అవాంఛనీయ సంఘటనలు జరగకుండా భక్తులు అధిక సంఖ్యలో పాల్గొని పీర్లను నిమజ్జనం చేశారు.
అనంతపురంలో..
అనంతపురం జిల్లా ఉరవకొండ మండలం మూలిగిరిపల్లి గ్రామంలో వెంకటేశ్వర స్వామి శంఖు -చక్రాల గుర్తులతో ఉన్న పీర్లను గ్రామస్తులు ఉరేగించారు . ఇలా పీర్లను శంకు చక్రాలతో ఊరేగించడం ఆనవాయితీగా కొనసాగుతోందని గ్రామస్తులు చెప్తుతున్నారు.
మూలగిరిపల్లి గ్రామంలో మొహరం వేడుకలు వైభవంగా జరిగాయి. కులమతాలకు అతీతంగా.. హిందూ ముస్లింలు పండగను జరపుకుంటారు. ఇక్కడి ప్రత్యేకత ఏమిటంటే.. పీర్ల దేవుళ్ళు వెంకటేశ్వర స్వామి శంఖు , చక్రాలతో దర్శనం ఇవ్వడం. హిందూ ముస్లిం కలిసి పండుగ జరుపుకోవడం. హిందూ, ముస్లింలు భక్తితో పానకాలు చేసుకొని మొక్కులు తీర్చుకుంటారు. ఈ గ్రామంలో దేవాలయం అంటే ఇదొక్కటే. ప్రతి కార్యం మొదలు పెట్టాలంటే ఇక్కడ మొదట పూజ చేసి మొదలుపెట్టడం ప్రత్యేకత. ఈ దృశ్యాన్ని చూడ్డానికి వందల సంఖ్యలో వస్తుంటారు.
ఇదీ చదవండి: మొదలైన మొహర్రం వేడుకలు.. కుళ్లాయస్వామిని దర్శించుకున్న భక్తులు
